Россиянинг Саратов вилоятида Ўзбекистон фуқароларининг ҳақ-ҳуқуқи тикланиб, 200 минг рубль иш ҳақи ундириб берилди. Бу ҳақда Ташқи меҳнат миграцияси агентлиги ахборот хизмати хабар қилди.
Унга кўра, вилоятдаги «Мелиоратор» корхонасида вақтинчалик меҳнат фаолиятини амалга ошираётганлар — Ғ.С. ва унинг турмуш ўртоғи У.Г. иш берувчи ойлик иш ҳақини бермаётганини айтиб мурожаат қилган.
Ташқи меҳнат миграцияси агентлигининг Самара шаҳридаги ваколатхонаси ходимлари қишлоқ хўжалиги маҳсулотлари етиштиришга ихтисослашган мазкур корхонага бориб, вазиятни ўрганганида корхона раҳбари уларни паспорт ва икки ойлик иш ҳақларини бермасдан ишлатаётгани маълум бўлди.
Музокаралар натижасида меҳнат мигрантларининг паспорт ва 200 минг рубль ойлик иш ҳақлари олиб берилди. Иш берувчи Россиянинг тегишли ҳуқуқий-меъёрий ҳужжатлари бўйича жавобгарликка тортилиши ҳақида огоҳлантирилди.
Изоҳ (0)