Ижтимоий тармоқларда Жиззахда қаровсиз қолган итларга ваҳшийлик билан муносабатда бўлингани ҳақида хабар эълон қилинди. Мазкур масала юзасидан вилоят ички ишлар бошқармаси томонидан ўрганиш олиб борилди.
Ҳолат юзасидан суриштирув ишлари давомида «Тинчлик» маҳалласи раиси А.Э.нинг мурожаати асосида болаларни қўрқитиб, қаровсиз юрган ит 19 июль куни шаҳар ободонлаштириш бошқармасининг «Ёввойи ҳайвонларни тутиш бригадаси» ходими Э.И. томонидан отилгани маълум бўлди.
Бу жараёнда масъул ходим санитария-гигиена қоидалари, шунингдек, ўқотар қуролдан белгиланган тартибни бузган ҳолда отишда ифодаланган ҳуқуқбузарлик содир этгани аниқланди. Ҳолат юзасидан Маъмурий жавобгарлик тўғрисидаги кодекснинг 185-моддасида (ўқотар қуроллардан белгиланган тартибни бузган ҳолда отиш) кўрсатилган ҳуқуқбузарлик аломатлари мавжудлиги сабабли Э.И.га нисбатан қонуний чора кўрилди.
Telegram’даги «Ekolog.uz» каналида аниқлик киритилишича, ит отилган ўқдан нобуд бўлган.
«Унутманг, фақатгина Ўзбекистонда бошпанасиз ҳайвонлар болаларни қўрқитиб юради, ҳайвонлар ўзидан ўзи болаларга ташланиб қолади, ўзидан ўзи уларни тишлаб олади. Қачон бунақа ақлга сиғмас эскича муносабатлардан йироқлашамиз? Қўрқитгани борасида исбот борми? Қўрқитган бўлса, отиб ўлдириш керак деганими бу? Унутманг, ҳеч бир ҳайвон сиз озор етказмасангиз, сизга озор етказмайди», — дейилган канал хабарида.
Изоҳ (0)