Фарғонада 2022 йилнинг январь—июнь ойлари давомида тез тиббий ёрдам хизматига 719 минг 847 та мурожаат келиб тушган, уларнинг 388 таси ёлғон чақириқ деб баҳоланган. Бу ҳақда вилоятда тез тиббий ёрдам тизимидаги муаммолар ва уларнинг ечимига бағишланган матбуот анжуманида маълум қилинди, деб хабар бермоқда «Дарё» мухбири Азизжон Эрматов.
Матбуот анжуманида вилоят соғлиқни сақлаш бошқармаси бошлиғи Абдуқаюм Тўхтақулов ўтган даврда тизимда амалга оширилган ишлар, йўл қўйилаётган камчиликлар, аҳолининг ҳақли эътирозларига сабаб бўлаётган долзарб масалалар, тиббиёт муассасалари фаолиятига оид муаммоларни бартараф этиш вазифалари ҳамда келгусида амалга оширилиши режалаштирилган ишлар юзасидан ахборот берди.
Шунингдек, тез тиббий ёрдам ходимлари малакасини ошириш учун Россия, Туркия, Жанубий Корея, Франция каби тез ёрдам тизими илғор бўлган мамлакатларга юборилиши режалаштирилгани маълум қилинди.
Қайд этилишича, чақирувларга етиб боришнинг ўртача вақти 40 дақиқани ташкил этган. Чақирувларнинг 220 минг 965 таси сурункали касаллиги бор беморлар ҳиссасига тўғри келган. Ёлғон чақирувлар ва сурункали беморларнинг мурожаатлари айрим вазиятларда тез тиббий ёрдамнинг кечикишига сабаб бўлаётгани таъкидланди.
«Тез ёрдамга келиб тушган мурожаатлар сони бўйича Фарғона вилояти республикада биринчи ўринда туради. Бир йилда бир ярим миллионта чақирув бўлади. Уларнинг олти юз мингтаси сурункали касаллиги бор беморлар ҳиссасига тўғри келади. Бу ҳам тез ёрдамнинг кечикиб боришига асосий сабаблардан биридир. Масалан, сурункали касаллиги бор одам кундузи шифокор кўригига бориб, даволанишни бошлайди. Касаллик одатда кечқурунга бориб кучаяди. Кейин 103 га мурожаат қилиб, бўғими оғриётганидан шикоят қилади», — дейди Абдуқаюм Тўхтақулов.
Аввалроқ Ўзбекистонда 2022 йилнинг 6 ойи давомида тез ёрдамга 2700 дан зиёд ёлғон чақириқ келиб тушгани хабар берилганди.
Изоҳ (0)