Farg‘onada 2022-yilning yanvar—iyun oylari davomida tez tibbiy yordam xizmatiga 719 ming 847 ta murojaat kelib tushgan, ularning 388 tasi yolg‘on chaqiriq deb baholangan. Bu haqda viloyatda tez tibbiy yordam tizimidagi muammolar va ularning yechimiga bag‘ishlangan matbuot anjumanida ma’lum qilindi, deb xabar bermoqda “Daryo” muxbiri Azizjon Ermatov.
Matbuot anjumanida viloyat sog‘liqni saqlash boshqarmasi boshlig‘i Abduqayum To‘xtaqulov o‘tgan davrda tizimda amalga oshirilgan ishlar, yo‘l qo‘yilayotgan kamchiliklar, aholining haqli e’tirozlariga sabab bo‘layotgan dolzarb masalalar, tibbiyot muassasalari faoliyatiga oid muammolarni bartaraf etish vazifalari hamda kelgusida amalga oshirilishi rejalashtirilgan ishlar yuzasidan axborot berdi.
Shuningdek, tez tibbiy yordam xodimlari malakasini oshirish uchun Rossiya, Turkiya, Janubiy Koreya, Fransiya kabi tez yordam tizimi ilg‘or bo‘lgan mamlakatlarga yuborilishi rejalashtirilgani ma’lum qilindi.
Qayd etilishicha, chaqiruvlarga yetib borishning o‘rtacha vaqti 40 daqiqani tashkil etgan. Chaqiruvlarning 220 ming 965 tasi surunkali kasalligi bor bemorlar hissasiga to‘g‘ri kelgan. Yolg‘on chaqiruvlar va surunkali bemorlarning murojaatlari ayrim vaziyatlarda tez tibbiy yordamning kechikishiga sabab bo‘layotgani ta’kidlandi.
“Tez yordamga kelib tushgan murojaatlar soni bo‘yicha Farg‘ona viloyati respublikada birinchi o‘rinda turadi. Bir yilda bir yarim millionta chaqiruv bo‘ladi. Ularning olti yuz mingtasi surunkali kasalligi bor bemorlar hissasiga to‘g‘ri keladi. Bu ham tez yordamning kechikib borishiga asosiy sabablardan biridir. Masalan, surunkali kasalligi bor odam kunduzi shifokor ko‘rigiga borib, davolanishni boshlaydi. Kasallik odatda kechqurunga borib kuchayadi. Keyin 103 ga murojaat qilib, bo‘g‘imi og‘riyotganidan shikoyat qiladi”, — deydi Abduqayum To‘xtaqulov.
Avvalroq O‘zbekistonda 2022-yilning 6 oyi davomida tez yordamga 2700 dan ziyod yolg‘on chaqiriq kelib tushgani xabar berilgandi.
Izoh (0)