19 июль куни Запорожье вилоятида Россия ва Украина томони урушда ҳалок бўлган ҳарбийларнинг жасадларини «45 га 45» формуласи бўйича алмаштирди. Краматорск маркази ўққа тутилди: Давлат фавқулодда хизмати маълумотларига кўра, 10 киши жароҳатланган, маҳаллий ҳокимият бир киши ҳалок бўлганини маълум қилган. Украина президенти Владимир Зеленский Украина Қуролли кучлари раҳбариятида кадрлар ўзгаришини амалга оширди, Украина Олий Радаси Иван Баканов ва Ирина Венедиктовани мамлакат Хавфсизлик хизмати раҳбари ва бош прокурори лавозимларидан озод қилди. Европа Иттифоқи Россиянинг бир қанча банкларига нисбатан чекловларни юмшатишни режалаштирмоқда. Россия «Шимолий оқим 1» орқали газ етказиб беришни қайта тиклашни режалаштирмоқда. Meduza урушнинг 146-кунига оид асосий фотосуратларни жамлади.
Херсон
Херсонга ракета ҳужумининг оқибатлари. Россия ҳарбийлари томонидан тайинланган Херсон маҳаллий ҳокимияти маълумотларига кўра, ҳужум Украина қуролли кучлари томонидан Американинг HIMARS баравар ўт очувчи реактив тизимлари ёрдамида амалга оширилган. Россия томонининг маълумотларига кўра, учирилган олтита ракетанинг бештаси ҳаво мудофааси томонидан уриб туширилган, олтинчиси Днепр бўйлаб автомобиль-пиёдалар ўтадиган Антоновский кўпригига тегиб кетган.Фото: «ТАСС»
Одесса
Украиналик қутқарувчилар Одесса вилоятида Россия авиазарбасидан вайрон бўлган уй яқинида ишламоқда, олти киши жароҳатланган. Одесса вилояти ва унинг пойтахти июль ойида бир неча бор ўққа тутилди.Фото: AFP
Днепр
15 июль кунги Россия ҳужумидан кейин Днепрдаги турар жой биноси. Зарба оқибатида шаҳарнинг ўнг қирғоқдаги қисми сув таъминотисиз қолган. 16 июль куни шаҳар расмийлари уч киши ҳалок бўлгани ва 16 киши яралангани ҳақида хабар берган. Россия Мудофаа вазирлиги маълумотларига кўра, зарба оқибатида «Жанубий машинасозлик заводи» мудофаа корхонасининг «Точка-У» баллистик ракеталари учун бутловчи қисмлар ҳамда баравар ўт очувчи тизимларнинг реактив снарядларини ишлаб чиқариш ва таъмирлаш устахоналари вайрон қилинган. Днепрбўйи вилояти маъмурияти раҳбари Валентин Резниченко саноат корхонаси ва яқин атрофдаги кўча ўққа тутилишдан зарар кўрганини маълум қилди, бироқ бу қандай корхона эканига аниқлик киритмади.Фото: «Укринформ»
Донбасс шимоли
Украиналик ҳарбий хизматчилар «Град БМ-21» баравар ўт очувчи реактив тизимдан Россиянинг фронтдаги позицияларига ўқ узмоқда. Урушни ўрганиш бўйича Америка институти (ISW) таҳлилчиларига кўра, рус қўшинлари Изюмск-Славянск минтақасини унчалик аҳамиятли эмас деб ҳисоблаб, Донецк вилоятидаги Северск ва Бахмутни эгаллашга эътибор қаратмоқда.Фото: AFP
Полиция Краматорскда вафот этган фуқаронинг жасади ёнида. 19 июль куни Россия қўшинларининг шаҳарни ўққа тутиши оқибатида бир киши ҳалок бўлди, олти киши яраланди, деди Донецк вилояти маъмурияти раҳбари Павел Кириленко. Зарба оқибатида шаҳарнинг марказий қисмидаги ўнта кўп қаватли уй зарар кўрган. Донецк вилояти маъмурияти раҳбари минтақада қолган аҳолини имкон қадар тезроқ эвакуация қилишга чақирди.Фото: AFP
Изоҳ (0)