Россия президенти Владимир Путин кузда бир қанча мамлакатларга ташриф буюришни режалаштирмоқда. Бу ҳақда давлат раҳбарининг матбуот котиби Дмитрий Песков маълум қилди.
Кремль вакилининг сўзларига кўра, яқин орада хорижга сафарлар кутилмаяпти.
«Аммо кун тартибида, айтайлик, кузда бир нечта ташрифлар режалаштирилган. Уларни ҳозир олдиндан айтолмайман, лекин ҳақиқатан ҳам тайёргарлик кўрилмоқда», — деди Песков яқин орада янги хорижий ташрифлар ҳақидаги саволга жавоб берар экан.
19 июль куни Путин Теҳронга амалий ташриф билан келди ва у ерда Сурия бўйича Остона жараёни кафиллари бўлган давлат раҳбарларининг уч томонлама учрашувида иштирок этди, шунингдек, Эрон президенти Иброҳим Раисий, республика олий раҳбари Али Хоманаий ҳамда туркиялик ҳамкасби Ражаб Тоййиб Эрдўғон билан суҳбатлашди. Июнь ойи охирида Россия раҳбари Тожикистон ва Туркманистонга ташриф буюрган эди. Бу Украинадаги уруш бошланганидан бери илк хорижий ташрифлар бўлди.
15–16 ноябрь кунлари Индонезия G20 саммитига мезбонлик қилади (бу саммитда иқтисодиёти энг ривожланган ва ривожланаётган давлатлар, жумладан, Европа Иттифоқи, АҚШ, Россия, Хитой, Буюк Британия, Франция, Бразилия, Саудия Арабистони ва бошқалар иштирок этади). Июль ойи бошида Россия ТИВ Москва Жакартани Путиннинг G20 йиғилишида иштирок этмоқчилиги ҳақида хабардор қилганини маълум қилганди. Бироқ, таъкидланишича, саммитнинг онлайн ёки офлайн форматда ўтказилиши дунёдаги вазиятнинг ривожланишига ва Жануби-Шарқий Осиёдаги санитария-эпидемиологик вазиятга боғлиқ бўлади.
Изоҳ (0)