Буюк Британияда 19 июль куни тарихий максимал ҳарорат қайд этилди. Линколншир графлигидаги Конингсби шаҳрида ҳаво Цельсий бўйича 40,3 даражагача қизиган.
Британияда бундан аввалги рекорд — 38,7 даража иссиқ 2019 йил июль ойида Кембрижда қайд этилган эди. 2022 йилнинг 19 июлида бирданига 34 та аҳоли пунктида ҳарорат рекорд ўнатди, дея хабар бермоқда Британия об-ҳаво хизмати.
Жазирама туфайли Лондон атрофида ёнғинлар келиб чиқди. Хусусан, Дартфорд яланглигида ёнғинлар қайд этилган. Чўл яқинидаги Дартфорд Лондондан 20 километр узоқликда жойлашган.
BBC News Хертфордшир, Бедфордшир ҳудудлари, шунингдек, Лондоннинг ўзида – Веннингтон ва Кройдонда ёнғинлар юзага келгани ҳақида ҳам хабар бермоқда. Британия пойтахти аҳолиси уйларидан эвакуация қилинмоқда, юзлаб ўт ўчирувчилар жойларда ишламоқда, дейилади хабарда. Ёнғин оқибатида икки киши касалхонага ётқизилган.
Sky News хабар беришича, Лондон мери Содиқ Хон шаҳардаги вазиятни оғир деб атади. У аҳолини яқин кунларда шаҳар парклари ва хусусий боғларида, шунингдек, ҳовли ва балконларда барбекю қилмасликка чақирди. Лондон ўт ўчириш бўлими одатда кунига 300-350 та қўнғироқни қабул қиларди, 19 июль куни бу рақам 1600 тадан ошиб кетди, дейди шаҳар мери.
20 июль, чоршанба куни метеорологларнинг прогнозларига кўра, рекорд даражадаги иссиқлик тўлқини пасаяди, бироқ Буюк Британиянинг кўплаб ҳудудларида ҳаво ҳарорати йилнинг шу кунидаги ўртача кўрсаткичдан ҳамон юқори бўлади.
Изоҳ (0)