Rossiya prezidenti Vladimir Putin kuzda bir qancha mamlakatlarga tashrif buyurishni rejalashtirmoqda. Bu haqda davlat rahbarining matbuot kotibi Dmitriy Peskov ma’lum qildi.
Kreml vakilining so‘zlariga ko‘ra, yaqin orada xorijga safarlar kutilmayapti.
“Ammo kun tartibida, aytaylik, kuzda bir nechta tashriflar rejalashtirilgan. Ularni hozir oldindan aytolmayman, lekin haqiqatan ham tayyorgarlik ko‘rilmoqda”, — dedi Peskov yaqin orada yangi xorijiy tashriflar haqidagi savolga javob berar ekan.
19-iyul kuni Putin Tehronga amaliy tashrif bilan keldi va u yerda Suriya bo‘yicha Ostona jarayoni kafillari bo‘lgan davlat rahbarlarining uch tomonlama uchrashuvida ishtirok etdi, shuningdek, Eron prezidenti Ibrohim Raisiy, respublika oliy rahbari Ali Xomanaiy hamda turkiyalik hamkasbi Rajab Toyyib Erdo‘g‘on bilan suhbatlashdi. Iyun oyi oxirida Rossiya rahbari Tojikiston va Turkmanistonga tashrif buyurgan edi. Bu Ukrainadagi urush boshlanganidan beri ilk xorijiy tashriflar bo‘ldi.
15–16-noyabr kunlari Indoneziya G20 sammitiga mezbonlik qiladi (bu sammitda iqtisodiyoti eng rivojlangan va rivojlanayotgan davlatlar, jumladan, Yevropa Ittifoqi, AQSH, Rossiya, Xitoy, Buyuk Britaniya, Fransiya, Braziliya, Saudiya Arabistoni va boshqalar ishtirok etadi). Iyul oyi boshida Rossiya TIV Moskva Jakartani Putinning G20 yig‘ilishida ishtirok etmoqchiligi haqida xabardor qilganini ma’lum qilgandi. Biroq, ta’kidlanishicha, sammitning onlayn yoki oflayn formatda o‘tkazilishi dunyodagi vaziyatning rivojlanishiga va Janubi-Sharqiy Osiyodagi sanitariya-epidemiologik vaziyatga bog‘liq bo‘ladi.
Izoh (0)