Фарғона вилоятида 2022 йилнинг ўтган олти ойи мобайнида 14 киши сувга чўкиб, вафот этган. Бу ҳақда вилоят Фавқулодда вазиятлар бошқармасида журналистлар ва блогерлар иштирокида ўтказилган матбуот анжуманида маълум қилинди, дея хабар беради «Дарё» мухбири.
Айтилишича, 2021 йилда сувга чўкиш билан боғлиқ тўққизта бахтсиз ҳодиса содир бўлган бўлиб, оқибатда етти киши вафот этган.
«Жорий йилнинг ўтган олти ойи давомида сувга чўкиш билан боғлиқ 12 та ҳолат қайд этилган, 14 киши бахтсиз ҳодиса қурбонига айланган. Ушбу ҳолатларнинг саккизтаси вояга етмаганлар билан боғлиқ», — дейди бошқарма масъули.
Қўшимча қилинишича, Фавқулодда вазиятлар бошқармаси ходимлари томонидан бу каби бахтсиз ҳодисаларнинг олдини олиш мақсадида вилоятдаги дарё, канал ва сойлар қирғоқларига 1 минг 250 дан ортиқ чўмилиш та’қиқланганини англатувчи белгилар, 850 та тарғибот панноси, 65 та йирик ҳажмли баннер ўрнатилган.
Чўмилиш та’қиқланган ҳудудларда 1 минг 200 дан ортиқ профилактик тадбирлар ўтказилган.
Изоҳ (0)