Эстония бош вазири Кая Каллас истеъфога чиқди

Эстония бош вазири Кая Каллас президент Алар Карисдан истеъфо сўради, дея хабар берди Delfi нашри.

«Биз ҳукуматнинг навбатдан ташқари йиғилишини чақириб, янги Вазирлар Маҳкамасини шакллантириш учун мандат сўрадик. Ҳукумат душанба куни (18 июль) ишга киришади. Вазирликларга номзодлар бугун тушдан кейин эълон қилинади», — деди Каллас.

Агентликнинг қайд этишича, Каллас билан бирга бутун ҳукумат истеъфога чиққан. Эстония президенти янги ҳукуматга муваффақиятлар тилади.

Шунингдек, Каллас 15 июль куни рийгикогу (Эстония парламенти)нинг навбатдан ташқари йиғилишини чақиришни таклиф қилди, йиғилишда у ‘‘Ватан’’ ва Социал-демократик партия билан ўзининг янги ҳукмрон коалициясига мандат сўрамоқчи.

Марказ партияси ва Ислоҳотлар партиясини ўз ичига олган аввалги ҳукмрон коалиция июнь ойи бошида парчаланган, бунга болалар боғчаларини модернизация қилиш тўғрисидаги қонун лойиҳаси устидан келишмовчиликлар сабаб бўлган.

Ўшанда Каллас ҳукуматдаги Марказ партиясининг барча вакилларини ўз лавозимидан четлаштиришни таклиф қилган, президент тегишли фармонни имзолаган.

Шундан сўнг бош вазир истеъфога чиқиш ниятини билдирди. «Бу таклифни ўзим айтдим, чунки мен агар янги вазирларни тайинлаганимда шовқин-сурон ва норозилик юзага келарди», — дея тушунтирди у.

Калласнинг сўзларига кўра, «Ватан» партияси аъзолари янги ҳукуматни имкон қадар тезроқ тузмоқчи.

Кая Каллас 2010 йилда Эстония ислоҳотлар партиясига қўшилган ва бир йилдан сўнг Эстония парламентига сайланган. 2014 йилдан 2018 йилгача у Европарламент депутати, Европа Иттифоқи—Украина ҳамкорлик қўмитаси делегацияси раисининг ўринбосари бўлган.

2021 йилнинг январь ойида Юри Ратас ҳукумати истеъфога чиққанидан сўнг Каллас ҳукумат раҳбари ва Эстонияда бу лавозимни эгаллаган биринчи аёл бўлди. Унинг қўл остидаги вазирларнинг ярмини ҳам аёллар ташкил қилган.

Россия Украинада уруш бошлаганидан кейин, Кая Калланс Киевни ҳам сиёсий, ҳам моддий жиҳатдан қўллаб-қувватлашга ваъда берди. У Украинанинг Европа Иттифоқига қабул қилинишини ёқлади.

Мавзуга доир: Борис Жонсон Британия бош вазири лавозимидан истеъфога чиқаётганини эълон қилди