Фарғона вилоятида ҳавони ифлослантираётган бешта корхона фаолияти вақтинча тўхтатилди

Фарғона вилояти Ўзбекистон тумани Шўрсув шаҳарчаси ҳудудидаги қурилиш маҳсулотларини ишлаб чиқаришга ихтисослашган корхоналар ҳавони ифлослантираётгани ҳақида хабарлар тарқалди. Давлат экология қўмитаси ҳолат юзасидан ўрганишлар ўтказди.

Қайд этилишича, мазкур ҳудудда жойлашган корхоналарга қўмитанинг мобил экологик лабораторияси жалб қилиниб, ҳаводан намуналар олинди ва таҳлил амалга оширилган. Таҳлил натижаларига кўра, ҳавони ифлослантирувчи моддалар 4 та нуқтада 1,5 дан 23,6 мартага ва 2 та нуқтада 3,2 дан 4,6 мартага белгиланган меъёрлардан ортиқлиги аниқланган.

Ҳудудда жойлашган ишлаб чиқариш корхоналаридан чиқаётган чанг ва газларни камайтириш, атроф-муҳит ифлосланишини олдини олиш мақсадида 12 та корхоналарда текширишлар амалга оширилди.

Текширув давомида «Олмос гипс» МЧЖ, «Имкон гипс» ХК, «Файз гипс» ХК томонидан гипс ишлаб чиқариш цехи учун чанг-газ ушлаш қурилмаси ўрнатилмагани, давлат экологик экспертиза хулосалари олинмагани, «Евро глобал гипс» ХК, Gold Gisp Card МЧЖ томонидан ўрнатилган чанг-газ ушлаш қурилмалари талаб даражасида эмаслиги аниқланган.

Атмосфера ҳавосига ташланган гипс чанги ва атроф-муҳитга чиқарилган гипс тош чиқиндилар учун қўшимча компенсация суммалари ҳисобланиб, ваколат доирасида 5 та: «Олмос гипс» МЧЖ, «Евро глобал гипс» ХК, «Имкон гипс» ХК, «Файз гипс» ХК ва Gips Group National МЧЖлар фаолияти вақтинчалик тўхтатилиб, табиатни муҳофаза қилишга оид қонунчилик талаблари бажарилиши бўйича мажбурий кўрсатмалар берилган.

Таъкидланишича, белгиланган муддатда экологик талаблар бажарилмаганлиги сабабли корхоналар фаолиятини тўхтатиш учун Иқтисодий ишлар бўйича Ўзбекистон туманлараро судига ҳужжатлар тақдим этилган.

Давомий равишда 4 та гипс ва 2 та цемент ишлаб чиқариш корхоналар фаолиятида табиатни муҳофаза қилиш тўғрисидаги қонун ва қонуности ҳужжатлар ижросини ўрганиш юзасидан текшириш ўтказилиши бўйича ҳужжатлар расмийлаштирилмоқда.

Шу билан бирга, Ўзбекистон туманидаги қурилиш маҳсулотларини ишлаб чиқарувчи корхоналар фаолиятини табиатни муҳофаза қилиш қонунчилиги талаблари асосида йўлга қўйиш мақсадида ишлаб чиқариш корхоналарини экологик талаблар асосида модернизациялаш дастури лойиҳаси ишлаб чиқилди.

Дастур доирасида ҳудуддаги ишлаб чиқариш корхоналарида юқори самарадорликка эга чанг-газ тозалаш ускуналари ўрнатилади, шунингдек, Шўрсув шаҳарчасидаги саноат корхоналарини ўз ичига олган замонавий технологиялар билан жиҳозланган, атроф-муҳитга кам таъсир кўрсатувчи «яшил технологиялар»ни қўллаган ҳолда кластер усулида «кичик саноат зонаси» ташкил этилади.

Қўмитанинг билдирилишича, табиатни муҳофаза қилиш тўғрисидаги қонун ва қонуности ҳужжатлар ижросини ўрганиш ҳамда аниқланган камчиликларни бартараф этиш юзасидан амалий ишлар давом эттирилмоқда.

Эслатиб ўтамиз, март ойида вилоятнинг айнан шу ҳудудида жойлашган икки корхона фаолияти ҳавони ифлослантираётгани учун вақтинча тўхтатилганди.