«Бу — анъанага айланган амалиёт». Адлия бошқармаси Шуҳрат Абдураҳмонов имзолаган ҳужжат президент қароридан кўчирилганини одатий ҳол деб баҳолади

Андижон вилояти Адлия бошқармаси «Дарё»да эълон қилинган «Андижон ҳокими президент қарори ижросини таъминлаш бўйича қарор қабул қилди. Қарорида вазирларга, Тошкент шаҳар ҳокимига топшириқ берди», сарлавҳали мақолага муносабат билдирди.

«Мазкур мақолада Андижон вилоят ҳокимининг вазирлар ва ҳокимларга топшириқлар берганига, шунингдек, қарор адлия органлари томонидан ҳуқуқий экспертизадан ўтказилмаганига эътибор қаратилган. Вилоят ҳокими қарорларида одатда ижрочиларга тушунарли бўлиши учун президент қарорида кўрсатилган вазифалар матни такрор маълумот учун кўрсатиб ўтилади. Бу бошқа вилоятларда ҳам анъанага айланган амалиёт.

Вазирликларга топшириқлар берилган деган талқинни ҳам, юқоридаги ҳоким қарорининг тегишли бандини охиригача ўқиб чиқиб, аниқлаб олиш мумкин. Президент қароридаги топшириқлар маълумот ва ижро учун қабул қилинган. Шунингдек, вилоят ҳокими қарори билан иловалар тасдиқланмаган, балки президент қарорида тасдиқланганлиги инобатга олинган», — дейилади вилоят Адлия бошқармаси муносабатида.

Бошқарма масъуллари вилоят ҳокими қарори ҳуқуқий экспертизадан ўтказилмайди, демоқда.

«Ҳудудий адлия органлари томонидан қонунчиликка мувофиқ уч турдаги қарорлар — ер муносабатларига доир, норматив тусдаги қарорлар ва кўчмас мулкни бузиш билан боғлиқ қарорлар экспертизаси ўтказилади. Андижон вилояти ҳокимининг мазкур қарори юқоридаги қарорлар тоифасига кирмаганлиги сабабли адлия бошқармасидан ҳуқуқий экспертизадан ўтказилмайди. Ўзи ҳар бир ҳоким қарори адлия органларидан ҳуқуқий экспертизадан ўтади деган янглиш фикрлар мавжуд, лекин қонунчилик талабларида бу қоида йўқ. Ҳокимлик юрисконсулти бу ишни бажаради», — дейилади бошқарма ахборот хизмати берган муносабатда.

Аввалроқ Андижон вилояти ҳокимлиги мазкур мақолага муносабат билдириб, «президент қарори матнини ҳоким қарорида сўзма-сўз келтириб, унинг мазмунини тўлиқ етказиш мақсад қилинган», деганди.