Машҳурларнинг шахсий ҳаёти ҳамиша қизиқ. Шу боис ўзбек шоу-бизнесидаги машҳур эркакларнинг турмуш ўртоқлари ҳақида маълумот беришга қарор қилдик. Улар қандай соҳаларда фаолият юритади?
Шаҳризод Ғуломова
Машҳур актёр Жавоҳир Зокиров интервьюларида буюк ўзбек ёзувчиси ва шоири Ғафур Ғулом авлоди бўлмиш Шаҳризод Ғуломова билан оила қургунга қадар икки марта уйлангани ва унга учинчи турмуши омадли келганини таъкидлайди. Ҳозирда уларнинг бир қиз ва икки ўғили бор.
— Аёлим инглиз тили таржимони бўлиб ишлайди. Баъзи пайтлардан мендан ҳам яхшироқ пул топади. Агар у ишламаганда, менга анча қийин бўлган бўларди. Чунки актёрларнинг гонорари кўп кўрингани билан доимий эмас. Баъзан умуман ролларга чақиришмайди, баъзида эса чақирганларига боргим келмайди, — дейди актёр Жавоҳир Зокиров.
Маржона Собирова
Ҳамдам Собиров аёли Маржона билан севишиб оила қурган. Ҳозирда уларнинг бир ўғил ва бир қизи бор.
— Тадбиркорлик билан шуғулланаман, фақат айнан қайси йўналишда эканлигини ошкор этолмайман. Ҳозирги кунда кўпроқ болаларим билан бандман, — дейди Маржона Собирова.
Ирода Усмонова
Актёр Муҳаммадали Йўлдошев Ирода исмли қиз билан оила қурган. Ҳозирда уларнинг Муҳаммадали ва Мадина исмли фарзандлари бор. Ҳа адашмадингиз, ота ўғлига ўз исмини қўйган. Чунки унинг асл исми Муҳаммад ва болаликдан фарзандига Муҳаммадали исмини қўйишни ният қилган экан.
— Аёлим билан қурилиш молларини сотадиган бозорда танишиб қолганмиз. Мен онам билан, у дадаси билан кафел сотадиган дўконга кирган. Кўз-кўзга тушиб, ўртамизда муҳаббат пайдо бўлган. Тўрт ойда тўйимиз бўлган, — дейди Муҳаммадали Йўлдошев.
Шаҳноза Алиева
«Қадам» сериалидаги роли билан томошабинларга яхши таниш бўлган актёр Муҳаммадали Алиев эса Шаҳноза исмли қиз билан оила қурган. Ҳозирда уларнинг Асмира ва Салма исмли қизлари бор. Шаҳноза Алиева малакали психологлардан бири ҳисобланади.
— Санъаткор бўлишимга аёлим сабаб бўлган, агар у мажбур қилмаганида ҳали ҳам сотувчи бўлиб юрган бўлардим. Шаҳноза мен учун нафақат меҳрибон турмуш ўртоқ, балки яхши психолог ва зўр мотиватор ҳисобланади, — дейди актёр Муҳаммадали Алиев.
Зарина Умрзоқова
Актёр Азиз Умрзоқов Зарина исмли тиббиёт ходимаси бўлган қиз билан оила қурган. Ҳозирда уларнинг Усмон ва Мустафо исмли ўғиллари бор.
— Аёлимни илк бор «Қувноқлар ва зукколар» мусобақасида кўрганман. Ўшанда у ўзи ўқийдиган олийгоҳнинг жамоасидан иштирок этганди. Ҳайъат раиси сифатида унинг жамоасига паст балл қўйгандим. Кейин Zo‘r TV’даги кўрсатувда учратиб қолдим. Аввалига дўстона гаплашдим, кейин 4 йилда муносабатларимиз жиддийлашди. Аммо у пайтда уйланишга шароитим йўқ эди. Унга шароитим йўқлигини тушунтирдим, Зарина ўйлаб туриб агар рози бўлсангиз, биргаликда ҳаракат қиламиз, деди. У билан кредитга пул олиб, оила қурдик, тўй куни белгилангандан кейин имтиёзли уй олдик. Хуллас, аёлимнинг қадами қутлуғ келди, — дейди актёр Азиз Умрзоқов.
Дилноза Умурзоқова
Телебошловчи Жамшид Умурзоқов курсдоши Дилноза билан оила қурган. Ҳозирги кунда уларнинг Солиҳа, Самира ва Оиша исмли қизлари бор. Асли мутахассислиги халқаро журналистика бўлган Дилноза Умурзоқова ҳозирги кунда Ўзбекистондаги машҳур дизайнерлардан бири ҳисобланади.
— Аёлим билан бир университетда ўқиганмиз. Мен испан тилини, у инглиз тилини ўрганарди. Бир куни ёнимга келиб, бир сўзнинг таржимасини сўраган. Сўзнинг таржимаси сабаб бир-биримиз билан танишиб қолганмиз. Аммо институтни битиргунга қадар унга муносабатимни билдирмаганман. 2009 йили оила қурдик, — дейди олий тоифали сухандон Жамшид Умурзоқов.
Дилноза Аҳророва
Яқин кунларга қадар кўпчилик актёр Азамат Аҳроровни бўйдоқ деб биларди. Аммо «Лола гулим» фильмининг премьерасида у Дилноза исмли қиз билан оила қургани маълум бўлди. Ҳозирда уларнинг Сафия ва Азизмуҳаммад исмли фарзандлари бор.
— Биз съёмкада танишганмиз. Танишувимизга 6 йил аввал суратга олинган «Лола гулим» фильми сабаб бўлган. Бу фильм 2021 йилнинг сўнгида премьера қилинди, уни узоқ вақт кутдик, — дейди Дилноза Аҳророва.
Шаҳло Умарова
Азиз Раметов ва Шаҳло Умарованинг никоҳини йилнинг энг шов-шувли тўйларидан бири бўлди, дейиш мумкин. Нафақат актёрнинг, балки Шаҳло Умарованинг ҳурмати юзасидан ҳам кўплаб санъат вакиллари тўйга ташриф буюришди.
— Шаҳло билан Instagram’га жойланадиган реклама сабаб танишиб қолганмиз. У Nastarin Collection брендига асос солган. Хуллас, унинг реклама пули мен учун баракали келди. Бир-икки марта гаплашганимиздан кейин онам ҳам у қизни мақтай кетди. Кейин уйланиш ҳақида гап очдим, — дейди актёр Азиз Раметов.
Моҳинур Узоқова
Машҳур актёр Алишер Узоқов Моҳинур исмли қиз билан оила қурган. Ҳозирда уларнинг икки нафар фарзандлари бор. Моҳинур Узоқова мактабгача таълим муассасасида логопед бўлиб ишлайди.
Мавзуга доир:
Изоҳ (0)