Бухоро туманида яшовчи фуқаро укасига тегишли ер майдонини яширин равишда 120 минг долларга пуллаб, 20 минг долларни олдиндан олаётганда қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, фуқаро Ш.А. укаси Ж.А.нинг номида бўлган МЧЖга қарашли 7 гектар ер майдонини ўзбошимчалик билан сотишга уринган. У ҳамқишлоғи Ф.Н.нинг ишончига кириб, ер майдони аслида ўзига тегишли эканини билдирган. Ва ундан бу ер майдонини сотиши эвазига 120 минг доллар сўраган. Бироқ Ф.Н. ҳолатни суриштирган ва аканинг ўз укасига нисбатан фирибгарлик қилаётганини англаб етган. Ер сотувчи ака эса харидорга ерни тезроқ олишини, йўқса бошқа талабгор чиқаётганини айтган.
Ф.Н. эса ҳолат юзасидан ҳуқуқ-тартибот органларига хабар берган.
Шу куни Бош прокуратура ҳузуридаги департаментнинг вилоят бошқармаси ҳамда вилоят ИИБ тезкор гуруҳи тадбир ўтказган. Ер сотувчи ака харидордан келишилган 120 минг долларнинг 20 минг долларини олдиндан олаётган вақтда қўлга олинган.
Мазкур ҳолат юзасидан айбдорга нисбатан Жиноят кодексининг 168-моддаси ( фирибгарлик) билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)