Қорақалпоғистонда узоқ масофадаги маҳаллаларда тиббиёт пунктлари ташкил этилади. Бу ҳақда «Қорақалпоғистон Республикасида 2022–2024 йилларда аҳоли саломатлигини муҳофаза қилишни янада кучайтириш тўғрисида» президент қарорида белгиланди.
Қарорга мувофиқ, 2022 йил якунигача:
- бирламчи тиббий-санитария ёрдами муассасаларидан узоқ масофада жойлашган маҳаллаларда қўшимча 34 та маҳалла тиббиёт пунктлари ташкил этилади;
- тез тиббий ёрдам хизмати 63 та янги тез тиббий ёрдам махсус автотранспортлар билан таъминланади.
- кўп тармоқли марказий поликлиника ва оилавий поликлиника филиаллари негизида 16 та оилавий шифокор пунктлари ташкил этилади;
- болалар орасида кўп учраётган касалликларни эрта аниқлаш мақсадида 2–10 ёшли болалар орасида гелминтоз, 12–15 ёшли қизлар орасида камқонлик касаллиги бўйича скрининг дастурлари жорий этилади.
2022—2024 йилларда камида 75 нафар тиббиёт ходимлари нуфузли хорижий тиббиёт муассасалари ва марказларига малака ошириш ва стажировка ўташ учун юборилади.
Қарор билан Қорақалпоғистон Республикасида 2022—2024 йилларда аҳолига кўрсатилаётган тиббий-санитария ёрдамининг сифат ва самарадорлигини ошириш бўйича қўшимча чора-тадбирлар дастури ҳам тасдиқланди.
Изоҳ (0)