Navoiyda salkam 10 sotix yerni 45 ming dollarga pullashga uringan shaxs qo‘lga olindi

Navoiy viloyatida 9,9 sotix yer maydonini 45 ming dollar evaziga sotishga uringan shaxs qo‘lga olindi. Bu haqda “Daryo”ga viloyat IIB axborot xizmati rahbari O‘ktam Usmonov xabar berdi.

Viloyatning Karmana tumanida yashovchi tadbirkor O‘.H. o‘ziga davlat-xususiy sherikchilik shartlari asosida sun’iy qoplamali futbol maydonchasi va yordamchi bino obyektini qurish uchun berilgan 9,9 sotix yer maydonini fuqaro A.O.ga savdo majmuasi qurish uchun 45 ming dollarga sotishga uringan. Va u xaridorga majmuani qurib bo‘lgach, yerni hokimiyat va arxitekturada ishlovchi tanishlari orqali rasmiylashtirib berishini ham va’da qilgan. 13-aprel kuni DXXning viloyat boshqarmasi hamda viloyat prokuraturasi hamkorligida o‘tkazilgan tezkor tadbirda yer sotuvchi kelishilgan pulning 30 ming dollarni olgan vaqtida qo‘lga olingan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.

Avvalroq Samarqandda 40 sotix yerni 20 ming dollarga sotishga uringan shaxslar qo‘lga olingani, Toshkent viloyatining Bo‘stonliq tumanida esa maktabgacha ta’lim muassasasi va savdo-maishiy xizmat ko‘rsatish majmualari qurilishi uchun ajratilgan 40 gektar yerni 3 million dollarga sotishga uringanlar va Samarqandda yerni noqonuniy sotmoqchi bo‘lgan shaxs ushlangani xabar berilgandi.