Тошкент шаҳар Юнусобод туманида 3 декабрь куни 7 нафар шахс ўзи ишлаган хонадонга бостириб кириб, 15 минг доллар ва Gentra автомобилини ўғирлаб кетгани хабар қилинганди. Ички ишлар вазирлиги қонунбузарларга суд ҳукми ўқилганини маълум қилди.
Ўша куни уста ва унинг 6 нафар шериги туманнинг «Отчопар» маҳалласидаги хонадонлардан бирига ўзганинг мулкини талон-торож қилиш мақсадида кирган. Улар юзларига ниқоб тақиб олган ҳолда, ўткир тиғли жисм билан қуролланган.
Хонадонда уй эгаси бўлган аёлнинг бир ўзи эканидан фойдаланиб, жиноятчилар унинг қўл-оёқларини «скотч» ёрдамида боғлаб, пичоқ билан таҳдид қилган ва моддий бойликлари қаерда эканини сўраган.
Номаълум шахслар ётоқхонадаги сейфни бузиб, ичидаги пул маблағлари билан бирга олган. Воқеа жойидан яширинмоқчи бўлганда жабрланувчининг икки қизи Gentra автомобилида келиб қолган. Жиноятчилар уларни ҳам мажбурлаб олиб кирган, пичоқ билан таҳдид қилиб, Gentra’га ўтириб, ҳодиса жойидан яширинган.
Ушбу жиноий гуруҳ қисқа вақт ичида Тошкент шаҳар ИИББ ходимлари томонидан ушланган. 44 ёшли Тоҳир, 36 ёшли Одил, 34 ёшли Баҳодир, 31 ёшли Муродилла, Аброр, 25 ёшли Азамат, 24 ёшли Муҳаммад, 22 ёшли Дониёрга Жиноят кодексининг 164-моддаси (босқинчилик) ва 267-моддаси (транспорт воситасини олиб қочиш) билан айб эълон қилиниб, қамоққа олиш эҳтиёт чораси қўлланган.
Суд ҳукмига кўра, судланувчилардан бири Жиноят кодексининг 164-моддаси 4-қисми «а» банди ва 267-моддаси 2-қисми «б, в» бандларида назарда тутилган жиноятларни содир этганликда айбдор деб топилган. Унга 15 йил 8 ой муддатга озодликдан маҳрум қилиш жазоси тайинланган. Қолган 4 нафар шахсга 11 йил қамоқ жазоси тайинланган. Улардан бир Тожикистон фуқароси бўлгани боис, жазони ўтаб бўлгач Ўзбекистон ҳудудидан чиқариб юборилиши белгиланган. Шунингдек, судланувчиларнинг бир нафари 10 йил, икки нафари 15 йил 6 ой муддатга озодликдан маҳрум қилиш жазоси тайинланган.
Изоҳ (0)