Ўзбекистонда маҳаллийлаштириш даражасининг пастлиги сабаб импорт хом ашё ва материалларга юқори даражада қарамлик юзага келмоқда. Бу ҳақда Сенатнинг 28-ялпи мажлисида маълум қилинди.
Мажлисда маҳаллийлаштириш дастури асосида 2021 йилда амалга оширилган ишлар муҳокама этилган. Муҳокамалар жараёнида амалга оширилган лойиҳалар доирасида сув ташувчи юк машинаси, бурғилаш насоси, кичик қувватли электр моторлар, ультратовушли сув ўлчагичлар сингари маҳсулотлар ишлаб чиқарилиши йўлга қўйилгани қайд этилди.
Шунингдек, маҳаллийлаштириш дастурини таъминлашда айрим муаммоларга ҳам эътибор қаратилган. Қайд этилишича, маҳаллийлаштириш даражасининг пастлиги импорт хом ашё ва материалларга юқори даражада қарамликни юзага келтириб чиқармоқда. Натижада маҳсулот нархи ошиб, аҳолининг харид қобилиятига салбий таъсир кўрсатмоқда.
Жумладан, 2021 йилда маҳаллийлаштириш дастурига киритилган 1,9 триллион сўмлик 115 та лойиҳа ишга туширилмаган, 203 та лойиҳа бўйича маҳаллий маҳсулотларни ишлаб чиқариш режаси бажарилмаган.
«Ўзавтосаноат» АЖ, Фармацевтика тармоғини ривожлантириш агентлиги, «Ўзмахсусмонтажқурилиш» АК, «Ўзтўқимачиликсанаот» уюшмаси, «Ўзелтехсаноат» уюшмасининг, ҳудудлар кесимида эса Хоразм, Қашқадарё, Андижон, Самарқанд вилоятларининг маҳаллийлаштириш режалари ижроси тўлиқ таъминланмаган.
Бундан ташқари, www.cooperation.uz электрон портали орқали қонунчиликка зид равишда тўғридан-тўғри шартномалар тузиш, юқори нархларда харидларни амалга ошириш, маҳаллий ишлаб чиқарувчи субъектлар бўлмаган ҳамда импорт товарларини электрон кооперация биржасида сотиш ҳолатлари аниқланган.
Муҳокама якунида иқтисодиётнинг ишлаб чиқариш соҳасида маҳаллийлаштириш дастурлари ижроси юзасидан ҳукуматга парламент сўрови юбориш тўғрисида Сенат қарори қабул қилинган.
Шавкат Мирзиёев март ойида бўлиб ўтган видеоселектор йиғилишида масъулларга 283 турдаги импорт маҳсулотини маҳаллийлаштириш топшириғини берганди.
Изоҳ (0)