Қозоғистонда 8 июлдан буғдой, ун ва кунгабоқар уруғи экспортига чекловлар киритилмоқда, деб ёзади «Gazeta.uz». Тегишли буйруқни қишлоқ хўжалик вазири Ербол Карашукеев имзолади.
Мамлакатдан 550 минг тоннадан кўп буғдой ёки меслин (буғдой ва жавдар аралашмаси), 370 минг тоннадан ортиқ буғдой ёки жавдари ун ва 15 минг тоннадан кўп уруғ олиб чиқиш мумкин эмас.
Квоталар мамлакат озиқ-овқат хавфсизлигини таъминлаш учун киритилмоқда ва 30 сентябргача амал қилади.
Ўтган сафар Қозоғистон Қишлоқ хўжалик вазирлиги апрель ойида дон ва ун олиб чиқиш учун квоталар жорий қилган эди. 15 июнгача мамлакатдан 1 миллион тоннадан ошиқ буғдой ёки меслин, шунингдек, 300 минг тоннадан кўп ун олиб чиқиш мумкин эмасди.
Карашукеевнинг сўзларига кўра, республика бутун дунёда дон тақчиллиги хавфи ҳамда Украинанинг Африка ва Яқин Шарққа дон етказиб бериш бўйича ўз ҳажмини таъминлашга қодир эмаслиги туфайли, шундай қадамни қўймоқда.
«Квоталаш Қозоғистонни ўртача бир йиллик экспорт ҳажмига тенг, назорат қилинувчи буғдой ва ун экспорти билан таъминлайди», — дейилади вазирлик хабарида.
Статистика маълумотларига кўра, 2022 йилгача Қозоғистон донининг экспорт салоҳияти тахминан 1 миллион 250 минг тоннани ташкил қилади.
1 июндан Ўзбекистон кунгабоқар ва пахта мойи, шунингдек, кунгабоқар уруғи ва бошқа мойли ўсимликлар экспортини тақиқлади.
Изоҳ (0)