Andijon viloyatining Qo‘rg‘ontepa tumanida bir guruh fuqarolar fastfuddan zaharlangani, holat yuzasidan jinoyat ishi qo‘zg‘atilgani haqida xabar berilgan edi. SSV matbuot xizmati zaharlangan bemorlar salomatligi va sanitariya holati nazoratga olinganini ma’lum qildi.
Ma’lumotlarga ko‘ra, ovqatdan zaharlanish tashxisi bilan jami 37 nafar bemor nazoratga olingan va yuqumli kasalliklar bo‘limiga davolanish uchun yotqizilgan. Ulardan 17 nafarida qayt qilish, ich ketishi, tana harorati ko‘tarilishi kabi kasallikning klinik belgilari namoyon bo‘lgan. Qolgan 20 nafarida esa biroz holsizlik va ko‘ngil aynishi kuzatilgan va ambulator ravishda davo muolajalarini olish uchun hududiy poliklinika nazoratiga yuborilgan.
“Daryo” muxbiri hodisa sabablarini o‘rganish maqsadida Qo‘rg‘ontepada bo‘ldi. O‘rganish davomida yuqumli kasalliklar shifoxonasining qabulxonasida turgan fuqarolar bilan suhbatlashdi. Suhbatlashganlarning aytishicha, ular aynan xotdog iste’mol qilgandan so‘ng salomatligida o‘zgarishlar bo‘lgan.
“Biz bozorda savdo qilamiz. Shuning uchun ham har kuni ko‘chada ovqatlanishga majbur bo‘lib qolamiz. O‘g‘lim har kuni o‘sha shoxobchadan fastfud buyurtma qiladi. Kecha ham xotdog yegandik. O‘sha kunni o‘zida ko‘ngli behuzur bo‘lib, oshqozoni bezovta qildi. O‘zim uyda dori-darmon berdim, ancha oyoqqa turib qoldi. Kecha nisbatan ahvoli og‘ir edi bugun sal o‘ziga keldi. Shunday bo‘lsa ham salbiy holatlarning oldini olish maqsadida yuqumli kasalliklar shifoxonasiga olib keldim”, — deydi shifokor qabulida o‘tirgan fuqarolardan biri.
“Kecha kunduzgi soat 12 larda xotdog yegandim. Uni ayam bozordan olib kelgandi. Aynan qayerdan ekanligini bilmayman. Kechadan beri uch marta qayt qildim. Oshqozonim qattiq og‘riyapti. Shu sababli onam shifoxonaga olib kelishga majbur bo‘ldi. Kasallar ko‘pligi uchun hali shifokor qabuliga kirmadik, navbatim kelishini kutyapman”, — deydi yana bir bemorlardan biri.
Yana bir bemor Ominaxon O‘ktamovaning aytishicha, ularda ham yengil tayyorlanadigan ovqatlar yeyish oqibatida oilaviy zaharlanish holati kuzatilgan.
“Kecha ich o‘tish, ko‘p qayt qilish bilan kelgandik. Bu yerga kelishimizdan bir kun oldin kechki ovqat vaqtida xotdog yegandik. Ertalab to‘qqizlarga yaqin bezovta bo‘la boshlaganimizdan keyin kelib murojaat qildik. Ikki kunlik davolanishlar bilan ancha o‘zimizga kelib qoldik. Shifokorlar kerakli dorilarni quyishyapti. Holatim kechagidan ancha yaxshi. Kecha hattoki boshimni xam ko‘tara olmayotgan edim. Lekin dadam bilan katta o‘g‘limda yana ozgina kasallik alomatlari bor”, — deydi Ominaxon O‘ktamova.
“Hod dog” tayyorlab sotuvchi tadbirkorning ma’lum qilishicha, korxonaga tegishli shoxobchalar uch yildan buyon faoliyat yuritib keladi. Ushbu davr mobaynida hech qanday salbiy holatlar yuz bermagan yoki mahsulotlardan shikoyat qilinmagan.
“Oilaviy korxonamizga tegishli shoxobchalar uch yildan buyon faoliyat yuritadi. Bir kunda o‘rtacha 100 tagacha va hattoki undan ortiq fastfud tayyorlanib, xaridorlarga tortiq qilinadi. Avval bunday holatlar yuz bermagan. Pandemiya paytida ham ‘dostavka’ xizmati orqali ishlaganmiz. Lekin hozirgidek muammolarga duch kelmaganmiz. Xaridorlardan ham shikoyatlar kelib tushmagan. Sodir bo‘lgan hodisada bizning shoxobcha mahsulotlari gumon qilingach, ‘SES’ga mahsulotlarimizni tekshirib berish uchun aloqa xati yubordik va ularga namunalar berdik. Bu ish bo‘yicha laboratoriya xulosalari uch kundan besh kunga qadar bo‘lgan muddat ichida chiqar ekan.
Fuqarolarning kasallanishi aynan bizning do‘konlar tomonidan tayyorlangan mahsulotlar tufaylimi yoki yo‘qmi, bu hali aniqlanmagan. Shuning uchun hozirda o‘zimni aybdor deb sanamayapman. Balki qisman ayb bizda ham bo‘lishi mumkin. Natija esa chiqadigan xulosalarga bog‘liq. Ayni paytda bizga tegishli bo‘lgan uchala fastfud do‘koni ham o‘z faoliyatini vaqtincha to‘xtatgan”, — deydi tadbirkor.
Andijon viloyati yuqumli kasalliklar shifoxonasi bosh shifokori G‘ofurjon Ibragimovning ma’lum qilishicha, holat bo‘yicha birinchi bemor qayd qilinishi bilan xabardor qilingan. Ma’lumot kelishi bilan ishchi guruhi tuzilib, malakali shifokorlarning bir guruhi bilan holatni o‘rganish boshlangan.
“Kechagi holat bo‘yicha kunduzi soat ikkilarda menga shoshilinch xabar berishib, o‘tkir diareya bilan fastfud yegan ikki nafar bemor kelganini bildirishdi. Kelib nazorat qilib berishimni so‘rashdi. Zudlik bilan manzilga yetib keldim. Kelganimda ikki nafar bemor bor edi. Undan keyin soat to‘rtlarda kasallar soni to‘rt nafarga yetdi. Tungi soat o‘ngacha esa jami yigirma yetti nafar fuqaro kasallanish bo‘yicha murojaat qildi. Ularning o‘n nafarida kasallik belgilari, ko‘ngil aynishi, ich ketishi, biroz holsizlik, qayt qilish holatlari aniqlandi. Barchasiga tez tibbiy yordamlar ko‘rsatildi. Qilingan dori-darmonlar natijasida ularning ahvoli yaxshilandi.
Bir narsani qayd etish lozim, aksariyat bemorlarimiz vahima qilib ‘biz ham fastfud yeganmiz’, deb qo‘rqib kelishgan. Ularda ozgina holsizlik, ko‘ngil aynishi bo‘lgan. Lekin kuchli kasallik belgilari namoyon bo‘lmagani uchun zarur muolajalar, tuzli suvlar, bir ikkita hazm qiluvchi hamda oshqozon tozalovchi dorilar berdik, holati yaxshilandi. Kechadan beri jami 27 nafardan 10 nafar bemorda kasallik belgilari namoyon bo‘lgan. Yaqin orada taxminan kasallarning yetmish foiziga uyiga javob beramiz. Bundan tashqari murojaat qilganlarning barchasi ma’lum muddat shifokor nazoratiga olinadi”, — deydi shifokor G‘ofurjon Ibragimov.
Qo‘rg‘ontepa tuman sanitariya-epidemiologik osoyishtalik va jamoat salomatligi xizmati bosh shifokori Feruzaxon Qodirovaning aytishicha, shaxobchalarda tayyorlangan mahsulotlardan olingan namunalar tegishli tartibda laboratoriya sinovlaridan o‘tkazilib, besh kun ichida xulosalari e’lon qilinadi.
“Hozirda Qo‘rg‘ontepa tuman sanitariya epidemiologik xizmati xodimlari tomonidan sinamalar olib laboratoriyaga topshirildi. Hozir ular tekshirilmoqda. Shuningdek, tumanimizdagi tez tayyor bo‘ladigan ovqat shoxobchalari ham nazorat qilinmoqda va aholiga tushuntirish ishlari olib borilmoqda. Kunlar issiq bo‘lgani sababli ham yarim tayyor mahsulotlarni iste’mol qilishda ehtiyot bo‘lishlarini so‘raymiz va ogohlikka chaqiramiz. Sinama natijalari besh kun ichida tegishli tartibda e’lon qilinadi”, — deydi Feruzaxon Qodirova.
Izoh (0)