«Халқаро рейтингларда ижобий кўрсатгичларга эришяпмиз. Лекин шу билан бирга қатор нуфузли рейтингларда ҳали кўрсатгичларимиз қониқарли эмас» — сенатор

Ўзбекистоннинг қатор нуфузли халқаро рейтинглардаги, хусусан, ахборотлар очиқлиги индексидаги ўрни мақтанарли даражада эмас. Бу ҳақда бугун, 6 июль куни Сенат қўмитаси раиси Равшанбек Алимов Ўзбекистон ташқи сиёсатига оид давра суҳбатидан сўнг журналистларга берган интервьюсида маълум қилди, дея хабар бермоқда «Дарё» мухбири.

Равшанбек Алимовнинг айтишича, муҳим рейтинглардаги ижобий кўрсатгичларга эришиш учун қонунлар ижросини таъминлаш керак.

«Халқаро рейтингларда ижобий кўрсатгичларга эришяпмиз. Лекин шу билан бирга қатор нуфузли рейтингларда ҳали кўрсатгичларимиз қониқарли эмас. Масалан, ахборотларнинг очиқлиги индексида. Шунингдек, бизнесни тартибга солувчи, экспортни рағбатлантирувчи механизмлар бўйича индекслардаги ўрнимиз билан мақтана олмаймиз. Бу борада жуда кўп амалий ишлар қилиш зарур. Биринчи навбатда, қабул қилинган қарорларни жойлардаги ижросини таъминлаш керак. Мазкур йўналишларда қонун ва қарорлар бор. Аммо уларни ижрони таъминлаш масаласи муаммо бўлмоқда. Шунинг учун бу ишда парламент аъзоларига юқори масъулият юкланмоқда», – деди сенат вакили.

Аввалроқ Сенат раисининг биринчи ўринбосари Содиқ Сафоев Ўзбекистон қонунлари тўғридан-тўғри амал қилмаслигини айтганди.