Россия ташқи ишлар вазири Сергей Лавров Ғарб Украинадаги вазиятни ёритувчи оммавий ахборот воситалари фаолиятини тўхтатиш учун барча саъй-ҳаракатларни амалга ошираётганини айтди. Унинг баёнотини «РИА Новости» эълон қилди.
Улан-Баторга ташрифи чоғида Лавров Ғарбни ОАВга босим ўтказишда айблаб, мамлакатлар Украинада бўлаётган воқеаларни ёритувчи ОАВ ишига тўсқинлик қилаётганини айтди. У Мўғулистондаги ҳамкорларини Москванинг Киевга қарши «махсус операцияси» қандай бораётгани ҳақида батафсил хабардор қилганини таъкидлади.
«Киев режими вакилларининг Украинада ўзини қандай тутгани ва тутаётгани ҳақидаги фактлар дунё ҳамжамиятига очиқ бўлишидан манфаатдормиз», — деди у Мўғулистон ташқи ишлар вазири Батмунхийн Баттцецег билан учрашувдан сўнг.
Эслатиб ўтамиз, аввалроқ Лавров АҚШда россиялик журналистлар таъқиб қилинаётганини даъво қилганди. Унинг сўзларига кўра, бу ҳодиса Европа ва Украинада ҳам кенг тарқалган. «Аввалига биз журналистлар ҳуқуқларини поймол қилувчи ўхшаш чоралар билан жавоб беришни истамадик, лекин Ғарбнинг ўзи сўз эркинлигини кўмди», — деган Лавров.
Изоҳ (0)