АҚШ президенти Жо Байден маъмурияти Хитойнинг бешта компаниясини Россия армиясига ҳарбий ёрдам берганликда айблаб қора рўйхатга киритди. Бу ҳақда Reuters хабар берди.
Қора рўйхатга олиш жараёнини назорат қилувчи АҚШ Савдо вазирлиги, Хитойнинг Connec Electronic, King Pai Technology, Sinno Electronics, Winninc Electronic ва World Jetta (HK) Logistics компаниялари қора рўйхатдаги ва санкциялар остидаги Россия субъектларига товарлар етказиб бериш бўйича шартномалар тузишда давом этаётганини маълум қилди.
Шунингдек, қора рўйхатга Ўзбекистон, Россия, БАА, Литва, Покистон, Сингапур, Буюк Британия ва Вьетнам каби давлатлардан яна 31 та компания киритилди, дейилади Федерал реестрдаги баёнотда. Жами 36 компаниядан 25 таси Хитойда савдо операцияларига эга эди.
«Бу ҳаракатлар бутун дунё бўйлаб бизнес ва жисмоний шахсларга, агар улар Россияни қўллаб-қувватлашга ҳаракат қилса, АҚШ ҳам улардан воз кечиши ҳақида кучли сигнал беради», — деди Савдо вазирининг саноат ва хавфсизлик бўйича ўринбосари Алан Эстевес.
Хитой Ташқи ишлар вазирлиги матбуот котиби Чжао Лицзян ушбу Хитой фирмалари Россия армиясига маҳсулот етказиб берганми, деган саволга на тасдиқ, на инкор жавобини берди, бироқ Хитой АҚШнинг Россияга қарши санкцияларига қарши эканини яна бир бор таъкидлади.
«Хитой ва Россия ўзаро ҳурмат ва манфаатларга асосланган нормал савдо ҳамкорлигини амалга оширмоқда. Бунга ҳеч қандай учинчи томон аралашмаслиги ёки чеклов қўймаслиги керак», — деди у Пекиндаги матбуот анжуманида.
Хитойлик фирмаларнинг қора рўйхатга киритилгани уларнинг америкалик таъминотчилари ўз маҳсулотларини Хитой компанияларига сотишдан олдин Савдо вазирлиги лицензиясини олиши кераклигини англатади.
Изоҳ (0)