Пенсия ва нафақаларни тарқатган сайёр касса ходимларининг хизмат сифати доимий назоратга олинган. Бу ҳақда ОАВ вакиллари учун Жиззах вилоятига уюштирилган пресс-турда «Халқ банки»га қарашли Call-марказ бошлиғи Фазлиддин Абдураҳмонов маълум қилди, дея хабар бермоқда «Дарё» мухбири.
Фазлиддин Абдураҳмоновнинг айтишича, пенсия ва нафақа тарқатган ходимларнинг хизмат сифати мижозлар билан боғланилган ҳолда текширувдан ўтказилади.
«Сайёр касса ходимларимиз белгиланган график асосида пенсия маблағларини тарқатгандан кейин, ой охирида пенсионер мижозларимизга чиқувчи қўнғироқлар қилиб, ходимларнинг хизмат сифатини текшириш ва боҳолаш мақсадида сўровнома ўтказамиз. Бу хизмат сифатини яхшилаш борасида қилинаётган ишлардан бири ҳисобланади. Бизга бўлаётган энг кўп мурожаат ҳам, албатта, пенсия ва нафақа масаласида. Пенсия маблағларини қайсидир мижозларга вақтида етказиб беришга тўғри келади. Айримларининг манзили вақтинча ўзгарган бўлади. Агар мижозлар ўз хонадонида йўқлиги аниқланиб сайёр касса ходими томонидан пуллар етказиб берилмаса, ходимларимиз шу жараённи назоратга олиб, пенсияни манзилгача етказиб борилишини таъминлайди. Пенсия масаласидан кейинги энг кўп мурожаатлар эса банк карталари ва кредит билан боғлиқ бўлмоқда», – деди банк ходими.
Фазлиддин Абдураҳмоновнинг таъкидлашича, Call-марказда 68 нафар ходим ишлаётган бўлиб, улар мурожаатларни йил давомида узлуксиз қабул қилади.
«Call-марказимиз умумий маълумотлар, амалиётлар, шикоятлар ҳамда техник қўллаш йўналишларида 7/24 режимида иш олиб боради. Бошқа банклардан фарқли равишда мижоз бизнинг оператор билан боғлана олмаган тақдирда, банк ходими унга қўнғироқ қилиб боғланади ва хизмат кўрсатади. Марказимизга бир кунда 2 мингдан зиёд мурожаатлар бутун республика аҳолисидан келиб тушади. Биз фақатгина пенсия ва нафақа йўналишларида эмас, балки кредит, омонат, пластик, халқаро пул ўтказмалари, юридик шахсларга хизмат кўрсатиш, мобил банкинг бўйича консалтинг хизматлари ва амалиётларни ҳам амалга оширамиз», – деди банк масъули.
Аввалроқ Ўзбекистонда 2022 - йил 1 майдан пенсия ва нафақалар миқдори 12 фоизга оширилгани хабар қилинганди.
Изоҳ (0)