Буюк Британия Жаҳон банки томонидан кредит кафолати шаклида Украинага бериладиган ёрдамни яна 429 миллион фунт стерлинг (525 миллион доллар)га оширишга тайёр, дея маълум қилди бош вазир Борис Жонсоннинг идораси. Киевга иқтисодий ва гуманитар ёрдам ҳажми 1,5 миллиард фунт стерлинггача ошади (жумладан 1,3 миллиард фунт стерлинг кредит кафолати). Лондон, шунингдек, 1,3 миллиард фунт стерлинг ҳажмидаги ҳарбий ёрдамни ҳам кўрсатди.
«Украина ҳукумати зудлик билан молиявий ёрдам берилмаса, кузгача молиявий ресурслари тугаб қолишидан хавотирда. Босим билан курашишга ёрдам бериш учун Буюк Британия жорий йил охирида Жаҳон банки кафолати сифатида яна 429 миллион фунт стерлинг таклиф қилишга тайёр», — дейилади Даунинг-стритнинг G7 саммити олдидан берган баёнотида.
Жонсон G7 саммитида иттифоқчиларни Украинага ёрдамни давом эттиришга чақирмоқчи. Унинг фикрича, «Ғарбнинг Украинани қўллаб-қувватлаш масаласида чарчагани ёки қатъиятсизлиги ҳақидаги ҳар қандай сигнал» Россиянинг фойдасига бўлади.
Аввалроқ Буюк Британия бош вазири Украина Россияга ён беришга мажбур бўлишидан хавотирдалигини маълум қилган эди. Жонсоннинг фикрича, Россиянинг ғалабаси «иқтисодий фалокат» бўлади.
Изоҳ (0)