Ukrainadagi urush: Severodonetsk shahriga olib boradigan barcha ko‘priklar vayron bo‘ldi

Mahalliy gubernator, Sergey Gaydayning so‘zlariga ko‘ra, hozirda Ukrainaning qurolli kuchlari joylashgan Severodonetsk shahriga olib boruvchi barcha ko‘priklar vayron qilingan.

Gubernatorning aytishicha, shahar amalda uzilib qolganligi sababli yuklarni yetkazib berish va tinch aholini evakuatsiya qilish imkonsiz bo‘lib qolmoqda.

Shaharning sharqiy qismida shiddatli janglar davom etmoqda, Ukraina rasmiylari ma’lum qilishicha Rossiya artilleriyasi ularni shahar markazidan siqib chiqaryapti.

Bir necha haftadan buyon Severodonetskni bosib olish Rossiyaning asosiy harbiy maqsadi bo‘lin qolmoqda.

Severodonetsk va unga yaqin joylashgan Lisichansk shahrini qo‘lga kiritish Moskvaga butun Lugansk viloyatini nazorat qilish imkonini beradi, viloyatning katta qismi allaqachon rossiyaparast ayirmachilar tomonidan nazorat qilinadi.

“Severodonetskka boradigan uchta ko‘prik ham vayron bo‘ldi”, deb yozdi Gayday o‘z Telegram sahifasida. Uning qo‘shimcha qilishicha, shaharda qolgan aholi “o‘ta og‘ir sharoitlarda” yashashga majbur.

Shaharni himoya qilish uchun jangda halok bo‘lganlar orasida sobiq britan askari Jordan Gatli ham borligini uning oilasi yakshanba kuni tasdiqladi.

Ukraina prezidenti Vladimir Zelenskiy shahar uchun jangning insoniy qiymatini “dahshatli” deb atadi. Unga so‘zlariga ko‘ra, Ukraina qo‘shinlari rus armiyasi bilan tom ma’noda “har bir metr uchun” jang qilmoqda.

Ma’lumotlarga ko‘ra, hozirda shaharning 70 foizga yaqin qismi Rossiya nazorati ostida.

Shaharda qolgan Ukraina qo‘shinlari “taslim bo‘lishi yoki o‘lishi kerak”, dedi o‘zini o‘zi mustaqil deb e’lon qilgan rossiyaparast Donetsk xalq respublikasi harbiy vakili.

DNR rahbari Eduard Basurin Donetskda OAV bilan suhbatda: “U yerda (Severodonetsk) bo‘lgan Ukraina bo‘linmalari o‘sha yerda abadiy qoladi”, degan.