Сардор Рашидов яна легионерга айланди. У Қатар клубига трансфер қилинди

«Пахтакор» ярим ҳимоячиси Сардор Рашидов фаолиятини Қатар Юлдузлар Лигасида давом эттиради. Бу ҳақда Тошкент клуби хабар берди.

Хабарда трансфер суммаси ва шартнома муддати маълум қилинмаган. Рашидовни ўтган мавсумда 6-ўринни эгаллаган «Умм Салал» ўз сафига қўшиб олган.

Сардорнинг «Пахтакор» билан шартномаси 2022 йилги мавсум сўнгига қадар мўлжалланганди.

Эслатиб ўтамиз, 30 ёшли футболчи 2021 йилнинг ёзида ҳам «Пахтакор»ни тарк этганди. Ўшанда у Кувайтнинг «Кувайт СК» клуби билан бир йиллик шартнома имзолаган. Бироқ у Кувайт клуби билан шартномани муддатидан бекор қилганди.

Сардор бунгача «Ал-Жаиш» (Қатар), «Ал-Жазира» (БАА), «Насионал» (Португалия) ва «Қатар СК» (Қатар) каби хориж клубларида фаолият юритган. Ўзбекистонда эса у «Пахтакор»дан ташқари «Сўғдиёна», «Бунёдкор» ва «Локомотив» шарафини ҳимоя қилган.

Рашидов Суперлиганинг 2022 йилги мавсумида «Пахтакор» сафида 9 ўйин ўтказиб, 1 та голга муаллифлик қилди.