Про-Лига доирасидаги ўйинда ҳакамларнинг баҳсли қарори оммавий тортишувга сабаб бўлди (видео)

Про-Лига 13-тури доирасида 23 июнь куни бўлиб ўтган «Хоразм» ва «Машъал» жамоалари ўртасидаги учрашувда (1:1) баҳсли ҳолат кузатилди.

Учрашувнинг 81-дақиқасида мезбонлар ташкил этган ҳужумдан кейин Темур Бекжанов дарвозани ишғол қилиб, ҳисобни 1:1 кўринишига келтирди. Учрашув бош ҳаками Достон Раҳмонов гол бўлганини қайд этиб, майдон марказини кўрсатди. Ўз навбатида бу қарорга ён ҳакам ҳам эътироз билдирмади.

Голдан кейин «Машъал» футболчилари бош ҳакамга, мураббийлар штаби эса ён ҳакам Александр Буровга кескин эътироз билдирди. Ушбу эътирозлардан кейин бош ҳакам ёрдамчиси билан маслаҳатлашди ва голни бекор қилди. Қайд этиш керак, учрашувда VAR тизими йўқ эди.

Ўз навбатида ҳакамнинг баҳсли қарори «Хоразм» футболчилари ва мураббийлар штабининг кескин реакциясига сабаб бўлди. Футболчилар аввалига бош ҳакам, кейинчалик лайнсмендан ҳолатга изоҳ талаб қилди.

Шунингдек, «Хоразм» мураббийлари ён ҳакамга кескин эътироз билдираётган вақтда икки жамоа вакиллари ўртасида оммавий тортишув юзага келди. Тортишувли ҳолат саккиз дақиқа давом этди. Якунда ҳакамлар ўз қарорини ўзгартирмади, гол инобатга олинмади.

«Хоразм» иккинчи бўлимга қўшиб берилган вақтнинг 9-дақиқасида гол урди ва ўйин 1:1 ҳисоби билан якунланди.