Ҳар бир инсон сувнинг организм учун зарур эканини билади — у тана ҳароратини ушлаб туради, токсинларни чиқариб ташлайди ва саломатликка ижобий таъсир кўрсатади. Мутахассислар айниқса ёзда чанқоқни қондириб туришни ва доимо ёнда сув олиб юришни тавсия қилади. Бироқ сувни овқатланиш жараёнида ичиш керакми? Grazia нашри қуйида ушбу саволга жавоб берди.
Маълумотларга кўра, овқат пайтида сув ичмаган яхшироқ, чунки у овқат ҳазм қилиш жараёнига салбий таъсир кўрсатиши, озуқа моддаларининг сўрилишига халақит бериши ва шишга олиб келиши мумкин. Бироқ бу қараш ҳақиқат эмас, балки янглиш фикрдир.
Гастроэнтерологларнинг таъкидлашича, овқат билан сув ичиш мутлақо хавфсиздир. Сув ва бошқа суюқликлар овқат ҳазм қилишга ижобий таъсир кўрсатади, озуқа моддаларининг сўрилишини рағбатлантиради, шунингдек, ичаклар билан боғлиқ муаммоларнинг олдини олади. Агар овқатланиш жараёнида кўпроқ сув ичилса, ортиқча овқатланишнинг олди олинади, чунки организм ўзини тезроқ тўқ ҳис қилади.
Агар бир вақтнинг ўзида сув ичиш ва овқатланиш зарарли бўлганида, шўрвалар фойдали таом ҳисобланмас эди. Улар организм ҳолатини яхшилагани учун, биз бир стакан сув зарар келтирмайди деган хулосага келиш мумкин. Асосийси, сувни кичик қултумларда ичиш лозим.
Изоҳ (0)