Ижтимоий тармоқларда «Олимпик»—«ОКМК» футбол учрашувидан сўнг жанжал юзага келгани тасвирланган видеолар тарқалди. Миллий гвардия Тошкент шаҳар бошқармаси ҳолатга расмий муносабат билдирди.
22 июнь куни «Локомотив» стадионида «Олимпик» ва «ОКМК» жамоалари ўртасида Суперлига доирасида ўзаро учрашув бўлиб ўтди. Биринчи бўлим якунланиши арафасида «ОКМК» ўйинчисига қизил карточка кўрсатилган. Ўйин тугагандан сўнг, «ОКМК» жамоаси мураббийи ва қизил карточка олган ўйинчи ҳакамга ўз эътирозини билдирган. Шу вақт мобайнида «ОКМК» жамоаси мураббийи ва кузатувчилари томонидан ҳам рақиб жамоага нисбатан ўз эътирозлари туфайли икки томон ўртасида ўзаро келишмовчилик юзага келган.
Мазкур тадбир давомида жамоат тартибини сақлашга жалб қилинган Миллий гвардия ва ИИББ ходимлари томонидан эса ушбу ҳолат ўз вақтида бартараф қилинган.
Аввалроқ Тошкент шаҳридаги «Пахтакор» стадионида футбол бўйича U-23 Осиё кубоги чорак финали доирасида Ўзбекистон—Ироқ ўйинини ёритишга борган «Севимли» телеканали мухбири ва тасвирчисига ички ишлар органлари ва Миллий гвардия ходимлари томонидан куч ишлатилгани, камераси тортиб олингани ҳақида хабар берилганди.
Изоҳ (0)