Ижтимоий тармоқларда Наманган вилоятининг Уйчи туманида ғалладан бўшаган далалар ёқиб юборилгани тасвирланган видеолар тарқалди. Вилоят ФВБ ҳолат юзасидан расмий маълумот берди.
Маълум қилинишича, туман экология ходимлари ёқиб юборилган дала майдонларига етиб борган. Ўрганишлар давомида «Олтин гавҳар» фермер хўжалигига қарашли 27 гектар ғалладан бўшаган ердаги сомонлар фуқаролар томонидан ўт қўйиб юбориш орқали тозалангани аниқланган.
Таъкидланишича, ҳозирда ушбу майдонни тозалаш мақсадида трактор орқали ишлов берилмоқда. Мазкур ҳолат юзасидан ўт ёққан фуқароларга нисбатан Маъмурий жавобгарлик тўғрисидаги кодекснинг 88-моддасига (атмосфера ҳавосини муҳофаза қилиш талабларига риоя қилмаслик) кўра баённомалар расмийлаштирилган.
Бундан аввал Самарқандда ғалласи ўриб олинган 3 гектар ер ёниб кетгани, Тошкентдаги Ботаника боғи ҳудудида ёнғин келиб чиққани ҳамда Сирдарёдаги ўрмон хўжалигининг салкам 150 гектар майдони ёниб кетгани ҳақида хабар берилганди.
Изоҳ (0)