Toshkentda o‘tkazilgan futbol o‘yinida stadionga tosh otganlarning 16 nafari qamaldi

Toshkent shahar IIBB “Paxtakor” stadionida o‘tkazilgan futbol musobaqasida tomoshabinlar tomonidan stadionga tosh otish holatlari kuzatilgani, natijada bir nafar shaxs jarohatlangani to‘g‘risida tarqalgan xabarlarga munosabat bildirdi.

11-iyun kuni soat 21:00 da Toshkent shahridagi “Paxtakor” stadionida Osiyo kubogi o‘yinlari doirasida 23 yoshgacha bo‘lgan futbolchilardan iborat O‘zbekiston va Iroq terma jamoalari o‘rtasidagi futbol o‘yini bo‘lib o‘tdi. O‘yinning 12-daqiqasida hakam tomonidan O‘zbekiston terma jamoasining darvozaboniga qizil kartochka ko‘rsatilib, 11 metrlik jarima to‘pi belgilanganda, muxlislar norozi bo‘lib, stadionga plastmassa suv idishi va stakan, oyoq ostidagi beton parchalarini uloqtirgan.

Natijada stadionda fotomuxbir bo‘lib xizmat olib borayotgan 30 yoshli J.S. qorin bo‘shlig‘idan jarohat olgan. Unga zudlik bilan tibbiy yordam ko‘rsatilgan. Jabrlanuvchining ahvoli yaxshi bo‘lgani sababli shu kuni kasalxonadan chiqqan.

Ma’lum qilinishicha, mazkur holat yuzasidan Toshkent shahar IIBB tomonidan tekshiruv o‘tkazilmoqda. Tekshiruv davomida jamoat tartibini buzgan 47 nafar shaxs aniqlanib, ularning 6 nafari: 24 yoshli A.Faxriddin, 31 yoshli T.Sarvar, 28 yoshli B.To‘xtamurod, 19 yoshli J.Behzod, 20 yoshli V.Mexroj, 24 yoshli X.Abrorga sud tomonidan 15 sutka ma’muriy qamoq jazosi tayinlangan.

Bundan tashqari, 10 nafar fuqaroga 10 sutka ma’muriy qamoq, 3 nafariga jarima jazosi belgilangan, 28 nafariga nisbatan esa surishtiruv davom etmoqda. Shuningdek, fuqaro J.S. unga narsa otgan shaxsga nisbatan da’vosi yo‘qligini ma’lum qilgan va ariza yozishdan bosh tortgan.

Avvalroq Toshkent shahridagi “Paxtakor” stadionida futbol bo‘yicha U-23 Osiyo kubogi chorak finali doirasida O‘zbekiston—Iroq o‘yinini yoritishga borgan “Sevimli” telekanali muxbiri va tasvirchisiga ichki ishlar organlari va Milliy gvardiya xodimlari tomonidan kuch ishlatilgani, kamerasi tortib olingani haqida xabar berilgandi.