Машҳур Голливуд актрисаси Сандра Буллок 2022 йил март ойида Entertainment Tonight нашрига берган интервьюсида фаолиятида танаффус қилмоқчи эканини маълум қилганди. The Hollywood Reporter билан суҳбатда актриса нима учун танаффус қилишга қарор қилгани ҳақда сўзлаб берди, деб ёзади Grazia.
Буллок келажакда енгилроқ иш кунига риоя қилишига умид билдирмоқда. Шунингдек, актриса ўз темпида яшашни сабрсизлик билан кутаётганини ҳам таъкидлаган. «Мен ўзимдан бошқа ҳеч кимнинг иш жадвалига қарам бўлишни хоҳламайман», — дейди Буллок.
У суҳбатда сўнгги йилларда бошдан кечирган кучли чарчоқ ҳақида ҳам айтиб ўтди. «Мен куйиб бўлдим. Жуда чарчадим, ҳаттоки соғлом, оқилона қарорлар ҳам қабул қила олмайман ва буни биламан», — дейди актриса ўз ҳолати ҳақида. Сандранинг қўшимча қилишича, у эришган муваффақият учун касбидан миннатдор бўлса-да, бунинг шахсий ҳаётига таъсири уни янада хавотирга солмоқда.
«Иш мен учун доимо узлуксиз фаолият бўлиб келган ва менга чиндан ҳам омад кулиб боқди. Мен тушундимки, бу менинг асосий таянчимга айланиб бормоқда. Бу музлаткични очиб, доимо ичида бўлмаган нарсани қидиришга ўхшайди. Мен ўзимга ўзим шундай дедим: Уни бу ердан қидиришни тўхтат, чунки у йўқ. Сизда эса бор, ўрнатинг, топинг ва ҳамма нарса яхши бўлади — меҳнатсиз ўзингизни мустаҳкамлай олмайсиз», — дея хулоса қилди актриса.
Актрисадан қачон кинога қайтишини сўрашганида, у ҳали буни ўзи ҳам билмаслигини айтди. Аммо яқинда Сандра Буллокни экранда «Ўқдан тез» фильмида кўриш мумкин. Жаҳон премьераси 2022 йил 14 июлга белгиланган.
Изоҳ (0)