Селим Байрактар — Сумбул оға ролини ўйнаган «Муҳташам юз йил» юлдузи бугун нималар билан банд? (фото)

Селим Байрактар 2022 йил 17 июнь куни 47 ёшга тўлди. Шу муносабат билан «Lisa.ru» нашри актёрнинг бу соҳага кириб келиши, тарихий сериалдан кейин қандай фильмларда суратга тушишга муваффақ бўлгани ва ҳозирда нималар билан банд экани ҳақида сўз юритди.

Селим Байрактар «Муҳташам юз йил» тарихий сериалидаги жуда машҳур ролни ижро этган. Томошабинларнинг қаҳрамонга муносабати ноаниқ эди: кимгадир унинг ҳазиллари ёқди, бошқалари уни қоралади. Бироқ Сумбул оғанинг ўз хоними Хуррам Султонга бўлган садоқатини ҳамма қадрлади.

Машҳурликка қадар узоқ йўл

Селим Ироқнинг Киркук шаҳрида туғилган. Ота-онаси санъатга алоқадор бўлмаганига қарамай, театр ва кинога жуда меҳр қўйган, фарзандларини билимли, зиёли, дунёқараши кенг инсонлар қилиб тарбиялашга ҳаракат қилган. Байрактар оиласи бадавлат эди, аммо Эрон-Ироқ можароси пайтида улар уйларини тарк этишга мажбур бўлди, чунки ўша пайтда ҳатто мактаб ўқувчилари ҳам ҳарбий хизматга чақирилган.

Ота-оналар ёлғиз ва суюкли ўғлини олиб кетишларидан қўрқиб, тезда қариндошлари яшайдиган Туркияга кўчиб кетишди. Бир неча йил ўтгач, оила алоҳида яшашга муваффақ бўлди: улар Анқарага кўчиб кетди, у ерда Селим ўрта мактабни тугатди ва театр мактабига осонгина ўқишга кирди. Айтиш керакки, у ҳам ота-онаси каби санъатга қизиққан ва ёшлигиданоқ актёр бўлишга қарор қилган.

Бироқ Байрактарга дарҳол машҳур роллар таклиф қилинмади ва дастлаб у аниматор ёки масхарабоз сифатида қўшимча пул ишлашга мажбур бўлди. Эҳтимол, бу тажриба туфайли актёр Сумбул каби образда осонлик билан намоён бўлгандир. Кейинчалик актёр театрга қабул қилинди, аммо кино олами унчалик ҳам ёқтириб кутиб олмади.

Биринчи марта актёр 30 ёшида суратга тушди. Кейин у «Кўприк» фильмида рол ўйнади ва ундан кейин яна бир нечта фильмларда иштирок этди. У умидсизликка тушмасликка ҳаракат қилди ва бир кун келиб фойдали таклиф олишига ишонди.

Байрактар ижодининг гуллаб-яшнаган вақти 2011 йилга тўғри келди — айнан ўша пайтда у иккинчи даражали роллардан бирига маъқулланган ва у аста-секин асосий ролларни ижро этувчи актёрлардан бирига айланган. «Муҳташам юз йил» ижодкорлари кастинглар давомида актёрнинг истеъдоди ва ғайриоддий юз ифодаларини юқори баҳолади — кейин улар Сумбул оға ролига ундан яхшироқ актёр топа олмаслигини англаб етди.

«Менинг қаҳрамоним мураккаб одам. Уни ижро этиш мен учун осон кечмади. Мен Туркия тарихини кўп ўргандим, бундан ташқари, унинг феъл-атвори ҳамманикидек эмас, амалдорнинг тақдири оғир эди», — деди Байрактар.

Ушбу лойиҳадан сўнг Байрактар фильмларда фаол рол ўйнашни бошлади: масалан, «Севги сенга ўхшайди» драмасида у ёвуз қаҳрамон сифатида қайта туғилди ва «Муҳташам юз йил» фильмида ҳам рол ўйнаган Бурак Ўзчивит унинг суратга олиш майдончасидаги ҳамкасбига айланди. Актёрнинг навбатдаги ролларидан бири «Усмонли империясининг юксалиши» тарихий фильми бўлиб, у вазир Чандарли Халил Пошо сифатида қайта туғилди.

«Муҳташам юз йил»дан кейинги ҳаёт

Томошабинлар актёрни танигач, унинг шахсий ҳаётига қизиқиб қолди. Кўпчилик ҳатто унинг оиласи йўқ, деб ўйларди. Бироқ Селим Биҳтер исмли аёл билан турмуш қурган ва у билан икки фарзанд — бир ўғил ва қизни тарбиялаб келмоқда. Маълумки, унинг рафиқаси мусиқачи ва Туркия давлат симфоник оркестрида ишлайди.

Аммо актёрнинг саҳифасида рафиқаси билан янги суратлар бўлмаса-да, у актриса Эмел Каракўз билан бирга кўпроқ эътиборга олинмоқда. Селим шахсий ҳаёти ҳақида гапиришни ёқтирмайди, шунинг учун у бу борада ҳеч қандай изоҳ бермоқчи эмас.

Айтганча, томошабинлар актёрни Сумбул образидан ташқарида кўриб, ҳайратда қолди. Суратга олиш ишлари тугаллангач, у соқолини ўстирди ва кўплаб картиналарда салбий характерга эга қаҳрамон сифатида пайдо бўлди. Актёр спорт билан мунтазам равишда шуғулланиб келади ва унинг гавдаси ҳам атлетик кўринишга эга. Мухлислар буни билиб, Байрактарни янги тимсол деб эълон қилди. Гарчи актёрнинг ўзи ташқи кўриниш эмас, балки унинг истеъдоди қадрланишини муҳим деб билади.