АҚШ президенти Дональд Трамп Калифорния штатидаги ёнғинлардан жабрланганларга ёрдам учун тўпланган 100 миллион доллар йўқолганини маълум қилди. Бу ҳақда у ўзининг Truth Social ижтимоий тармоғида ёзди.
“100 миллион доллар йўқолди. Бу маблағ Лос Анжелес ёнғинларидан жабрланганларга ёрдам бериши керак эди. Тўғри бошқарилганда, бу ёнғинлар ҳеч қачон содир бўлмаган бўларди”, деб таъкидлади у.
Шунингдек, Трамп Калифорния губернатори Гевин Ньюсомни ёнғинлар пайтида ҳаракатсизликда айблаб, шаҳарни қайта тиклашга чақирди. Америка етакчиси бундай катта маблағнинг йўқолишини фирибгарлик деб атаб, буни АҚШ Демократик партиясига боғлаган.
“FireАid — бу ҳақиқий фалокат. Бу демократлардан илҳом олган яна бир фирибгарлик схемасига ўхшайди”, деб ёзди АҚШ президенти.
Маълумот учун, Калифорниянинг жанубий қисмида, Лос Анжелес атрофида январь ойида табиий ёнғинлар туфайли 30 дан ортиқ киши ҳалок бўлди, 18 мингга яқин турли хил иншоотлар вайрон бўлди. Жамоат ташкилотлари, шу жумладан, Демократик партия билан боғлиқ ташкилотлар ёнғинлардан жабрланган ёки мол-мулкидан айрилганлар учун маблағ йиғишни эълон қилди. Ушбу ташаббус доирасида 30 январь куни Калифорнияда хонандалар Билли Айлиш, Леди Гага, Кети Перри ва бошқа машҳур ижрочилар иштирокида хайрия концерти ўтказилди. Тахминан 100 миллион доллар йиғилган, бироқ Fox News телеканалининг хабар беришича, маблағлар кейинчалик жабрланганларга тўғридан тўғри берилмай, бир қатор нодавлат ташкилотлар ўртасида тақсимланган.
Изоҳ (0)