Афғонистоннинг Пактика вилоятида содир бўлган зилзила қурбонлари сони 1000 кишидан, яраланганлар сони эса 1500 дан ошди. Бу ҳақда вилоят ҳокимияти вакиллари хабар қилди.
Расмийларнинг айтишича, фалокатда жабрланганларни шифохоналарга эвакуация қилиш учун вертолётлар ва тез ёрдам машиналари ҳудудларга етиб борган. Зилзила қатор турар жой биноларини вайрон қилган.
Дастлаб зилзилада ҳалок бўлганлар сони 250 кишидан ошгани ҳақида хабар берилганди, қурбонлар сони яна ортиши мумкин.
АҚШ Геология хизмати маълумотига кўра, 22 июнь куни эрта тонгда зилзила тахминан 51 километр чуқурликда содир бўлган. Германия Геология тадқиқот маркази эса зилзила 10 километр чуқурликда юзага келганини айтмоқда.
Европа Ўрта Ер денгизи сейсмология маркази маълумотларига кўра, зилзила Афғонистон, Покистон ва Ҳиндистоннинг 500 километрдан кўпроқ қисмида сезилган.Афғонистонда юз берган зилзила кучи Ўзбекистонда ҳам сезилди. ФВВ Сейсмопрогностик мониторинг Республика маркази хабарига кўра, Зилзила Сурхондарё вилоятида кўпроқ сезилди — 3 балл. Қашқадарё, Самарқанд ва Жиззах вилоятларида 2 баллдан сезилди.
Изоҳ (0)