Бугунги кунда Ўзбекистонда сариқ тарвуз ички бозор ва экспорт учун етиштирилмоқда. Қишлоқ хўжалиги вазирлиги бу ҳақида маълумот берди.
Тошкент вилояти Оҳангарон туманидаги фермер хўжалигида уруғи Жанубий Кореядан келтирилган Риамо навли сариқ тарвуз экилмоқда.
2015 йилда ташкил этилган ушбу хўжаликнинг умумий экин майдони 86 гектар бўлиб, шундан уч ярим гектарида сариқ (икки йилдан бери ҳосил олинмоқда) ва қизил тарвуз экилган.
45 гектарида ғалла, 10 гектарида помидор, 1 гектарида соя ва қолган майдонда маккажўхори ўстирилмоқда.
Сариқ тарвуз қандай пайдо болган?
Ушбу тарвуз жаҳон бозорида, шунингдек, Ўзбекистонда пайдо бўлганига кўп бўлгани йўқ. Сариқ тарвуз чет эллик селексионер олимлар томонидан ёввойи ва маданий тарвузни чатиштириш натижасида олинган гибрид ҳисобланади.
Илк ҳосил Ўрта Ер денгизи мамлакатларидан олинган бўлса, бугун бутун дунё бўйича етиштирилмоқда. Ташқи кўринишдан сариқ тарвузлар овалсимон ёки думалоқ бўлади.
Пўсти яшил, силлиқ ёки йўл-йўл рангда. Унинг ичи сариқ ҳамда вазни ўртача 1,5 килодан 4-5 килогачани ташкил этади.
Сариқ билан қизил тарвузнинг фарқи нимада?
Сариқ тарвузнинг уруғлари камроқ ёки умуман бўлмайди. Таъми манго, лимон ва ананасга ўхшаб кетади.
Сариқ тарвуз навлари қизилга қараганда сал олдинроқ пишади, яъни тезпишар саналади. Бутун дунё бўйича сариқ тарвуз нархлари қизилга қараганда бироз юқорироқ бўлиши кузатилмоқда.
Қандай етиштирилади?
Уруғидан етиштирилган кўчат тўғридан-тўғри очиқ ер майдонларига экилади. Бу муддат Ўзбекистоннинг марказий ҳудудларида март ойига тўғри келади.
Илк ҳосил май ўрталарида олинади. Иложи борича кўпроқ қуёш тушадиган майдонларни танлаш мақсадга мувофиқ.
Агар тунда совуқ ҳаво кузатиладиган бўлса, тарвуз устини ёпиш тавсия этилади. Сариқ тарвуз навлари касаллик ва зараркунандаларга чидамли. Шунинг учун махсус кимёвий дорилаш шарт эмас. Минерал ёки органик ўғитлар мос келади. Ҳосил йиғишга яқин вақтда суғоришни камайтириш керак. Шунда тарвуз ширинроқ бўлади. Тарвузнинг тупроққа тегиб турган жойи оқ ёки сарғиш рангга кирса ва уриб кўрганда махсус товуш эшитилса, демак, пишган бўлади.
Фойдали хусусиятлари
Сариқ тарвуз таркибида А, B1, B2, B5, B6, B9, Э, C, ПП витаминлари бор. Шунингдек, кальций, калий, магний, темир, натрий, фосфор моддаларига сероб.
У иммун тизимига ижобий таъсир қилади, турли инфекция, вирусларга қарши курашишда ёрдам беради. Энг муҳими, сариқ тарвуз парҳезда бўлган, аллергияси бор одамлар учун фойдали. Чунки унда қанд моддаси ва калория кам.
Изоҳ (0)