«АТR 72-600 самолётларидан фойдаланамиз» — Ўзбекистонда янги Silk Avia авиакомпаниясини яратиш ишлари қандай кетмоқда?

Ўзбекистонда Silk Avia янги авиакомпанияси ташкил этилмоқда. Бу ҳамёнбоп нархларда ички ҳаво қатновларини таъминлайдиган авиакомпания бўлади.

Uzbekistan Airports раҳбари Раъно Жўраева «Alter Ego»га берган интервьюсида авиакомпанияни яратиш ишлари ҳақида гапириб берди.

Авиакомпания очиш жуда қийин. Мисол учун, бизга керак бўлган самолётлар, АТR 72-600, бозорда деярли йўқ, — деди Жўраева.

Буларга талаб катта, чунки АТR 72-600 минтақавий рейслар учун энг мос келадиган самолёт. Шунга қарамай, самолётлар топилди.

Иккинчи савол — учувчилар. Улар ҳам жуда оз, лекин биз уларни топдик. Ҳозир учувчиларимизни тайёрлаб, Италияга ўқишга юборамиз, — деди Жўраева.

Ҳал қилинаётган яна иккита масала — чипталарни сотиш тизимини яратиш ва самолётларга техник хизмат кўрсатиш йўлга қуйиш.

Янги авиакомпанияни яратиш - бу бир вақтнинг ўзида йиғилиши керак бўлган жуда кўп турли қисмлар, — дея тушунтирди Жўраева.

Унинг сўзларига кўра, Silk Avia’нинг илк парвозлари 2022 йил сентябрь октябрь ойларига режалаштирилган.

АТR 72  — Франко-Италия АТR  концерни томонидан ишлаб чиқарилган турбовинтли ўрта масофали самолёт. 1300 кмгача бўлган масофага 74 тагача йўловчини ташиш учун мўлжалланган.

Аввалроқ Ўзбекистон бўйлаб 40 га яқин маҳаллий рейслар йўлга қўйилиши ҳақида хабар берилган эди.