«2022 — 2026 йилларда Хоразм вилоятида жойлашган маданий мерос объектларини реставрация қилиш, уларга олиб борувчи инфратузилмани тиклаш ҳамда «Ичан қалъа» давлат музей-қўриқхонасининг филиалларини ташкил этиш чора-тадбирлари тўғрисида»ги қарор лойиҳаси жамоатчилик муҳокамасига қўйилди.
Қайд этилишича, лойиҳа Маданий мерос агентлиги томонидан яратилган. Унга кўра, «Ичан қалъа» давлат музей-қўриқхонасининг янги музей филиаллари ташкил этилади. Ушбу муассасаларда Араб Муҳаммадхон мадрасасида сақланаётган 56 мингта нодир топилма ва буюмлардан иборат экспонатлар сақланади ва намойиш қилинади.
Агентлик ва Хоразм вилояти ҳокимликлари томонидан уч ой муддатда:
- «Ичан қалъа» давлат музей-қўриқхонасининг Кўҳна арк мажмуаси зарбхона биносида Хоразм хонлиги зарбхонаси тарихи музейи, Полвон қори савдо уйи биносида Оқ масжид меннонитлари тарихи музейи, Хива тумани, Огаҳий уйида Огаҳий уй-музейи, Дешон қалъада жойлашган Ҳазорасп дарвозасида Хоразм маданияти ва тарихи музейлари ташкил қилинади;
- музейлар низоми ишлаб чиқилади, тасдиқланади ва белгиланган тартибда давлат рўйхатидан ўтказилади;
- музейларнинг штатлар жадвали белгиланган тартибда ишлаб чиқилади ва тасдиқланади ҳамда малакали кадрлар билан тўлдирилади;
- музейларга замонавий интерфаол ахборот-коммуникация технологиялари жорий этилади;
- музейларда маданий-маърифий тадбирлар, давра суҳбатлари, ижодий учрашувлар ташкил этилади;
- манфаатдор вазирликлар ва идоралар билан биргаликда музейлар экспозициясини музей ашёлари билан тўлдириш чоралари кўрилади;
- музейларга сайёҳларни кенг жалб этилиши чораларини кўрилади.
Хива шаҳридаги «Ичан қалъа», «Дишанқалъа» ва бошқа маданий мерос объектларида реставрация ва таъмирлаш-тиклаш ишларини ҳамда уларга ёндош ҳудудларда қурилиш, реконструкция ва ободонлаштириш ишларини амалга оширишга фақат ЮНЕСКОнинг Умумжаҳон мерос маркази билан келишув мавжуд бўлган тақдирда рухсат берилади.
Изоҳ (0)