Ўз уйларини тарк этишга мажбур бўлган болалар сони 2021 йил охирида Иккинчи жаҳон уруши тугаганидан кейинги энг юқори кўрсаткичга — 36,5 миллионга етди, деб хабар бермоқда UNICEF.
«UNICEF ҳисоб-китобларига кўра, 2021 йил охири ҳолатига низолар, зўравонликлар ва бошқа инқирозлар оқибатида рекорд сондаги болалар — 36,5 миллион киши ўз уйларини тарк этишга мажбур бўлган, бу Иккинчи жаҳон уруши тугаганидан буён энг юқори кўрсаткичдир», — дейилади ташкилот пресс-релизида.
Таъкидланишича, кўрсатилган рақам чет элда бошпана қидираётган 13,7 миллион болани ва 22,8 миллион зўрлаб кўчирилган вояга етмаган шахсларни ўз ичига олади: улар ўз уйларини тарк этишга мажбур бўлган, аммо шу билан бирга ўз мамлакатлари ҳудудида қолмоқда.
Айни вақтда UNICEF экспертлари табиий офатлар оқибатида қочқинликка мубтало бўлган болаларни ҳисобга олгани йўқ.
Умуман олганда, дунёда қочқинлар ва зўрлаб кўчирилган шахслар сони сўнгги ўн йил ичида икки марта ошган, уларнинг ярмидан кўпини болалар ташкил қилади. Бундай болаларнинг учдан бир қисми Саҳрои Кабирдан жанубдаги Африка мамлакатларида, тўртдан бир қисми Европа ва Марказий Осиёда, 13 фоизи Яқин Шарқ ва Шимолий Африкада яшайди, дейилади UNICEF хабарида.
Аввалроқ БМТ миграция инқирози ва Украинадаги уруш сабаб яна қочоқларнинг ҳалокатли аҳволига эътибор қаратган эди. Ташкилотнинг йиллик ҳисоботига кўра, дунёдаги мажбурий қочқинлар сони аллақачон 90 миллионга яқинлашган.
Изоҳ (0)