Бирлашган Миллатлар Ташкилотининг Инсон ҳуқуқлари бўйича Олий комиссари Мишел Бачелет Афғонистон муваққат ҳукуматини аёлларга тизимли зулм ўтказиш, шунингдек, ҳуқуқ ҳимоячилари ва журналистларни таъқиб қилиш ва ҳибсга олиш сиёсатидан воз кечишга чақирди. У бу ҳақда 15 июнь куни БМТнинг Инсон ҳуқуқлари бўйича кенгаши йиғилишида айтиб ўтди.
Комиссар мамлакатдаги аҳолининг 93 фоизи чуқур иқтисодий, ижтимоий ва гуманитар инқироз шароитида тўйиб овқатланмаслигини таъкидлади. Қолаверса, у аёлларнинг фақат зарурат юзасидан ва фақат юзлари ёпиқ ҳолда кўчага чиқиши мумкинлиги, акс ҳолда уларнинг эркак қариндошлари жазога тортилиши белгиланган фармойишни қоралади. Аввалроқ, афғон ҳукумати ўрта мактаб ўқувчиларининг мактабларга қайтишини кечиктиришга қарор қилганди, Мишел Бачелетнинг сўзларига кўра, бу 1,1 миллион ўқувчи қизнинг ҳуқуқларига таъсир қилган.
«Бунга баҳо беришимга рухсат этинг: биз бугун Афғонистонда гувоҳ бўлаётган нарса — бу аёлларга нисбатан институционал систематик зулм ўтказишдир», — деди Инсон ҳуқуқлари бўйича олий комиссар.
Жаҳон соғлиқни сақлаш ташкилоти маълумотларига кўра, Афғонистонда қарийб 18,1 миллион киши, жумладан, 3 миллион нафари беш ёшгача бўлган болалар тиббий ёрдамга муҳтож.
БМТнинг Афғонистонда Инсон ҳуқуқлари бўйича вакили Ричард Беннет 26 май куни 11 кунлик ташрифидан сўнг Кобулда мамлакат инсон ҳуқуқлари билан боғлиқ жиддий муаммоларга дуч келаётганини таъкидлаганди. У расмийларни аёлларга қўйилган чекловларни бекор қилишга, хусусан, аёлларнинг меҳнат фаолиятига тўсиқларни, уларнинг ҳаракат ва сўз эркинлигидаги чекловларни олиб ташлашга, қизлар учун ёпилган мактабларни очишга чақирди.
2021 йил декабрь ҳолатига кўра, Афғонистонда аёлларнинг ишлашини тақиқлаш бир миллиард долларлик иқтисодий йўқотишга олиб келган. Бу мамлакат ялпи ички маҳсулотининг деярли 5 фоизини ташкил қилади.
Изоҳ (0)