Бухорода фуқаронинг Қозоғистондаги ўқишини Ўзбекистонга кўчириш учун 22 млн сўм олган талаба ушланди

Тошкент ва Бухоро вилоятларида ўқишга киритиш билан боғлиқ фирибгарлик ҳолатлари аниқланди, деб хабар беради Бош прокуратура ҳузуридаги департамент.

Маълум қилинишича, департаментнинг Чирчиқ шаҳар бўлими томонидан Тошкент вилояти ДХХ ва ИИБ ходимлари билан ҳамкорликда тезкор тадбир ўтказилган. Тадбирда М.А. исмли шахс юқори лавозимда ишловчи танишлари орқали фуқаро М.ни Ўзбекистон давлат жисмоний тарбия ва спорт университетига бакалавр йўналишига ўқишга киритиб қўйиш эвазига 5 минг доллар олган вақтида ашёвий далиллар билан ушланган.

Шунингдек, департаментнинг Бухоро вилоят бошқармаси томонидан ўтказилган терговга қадар текширувда, Бухоро давлат университети талабаси Ю.Ш. фуқаро Б.нинг қўшни Қозоғистон университетидаги ўқишини ўзи таълим олаётган университетнинг жисмоний тарбия факультетига кўчиртириб бериш эвазига 22 миллион сўмни фирибгарлик йўли билан қўлга киритгани аниқланган. Текширув давомида у ўз айбига иқрор бўлиб қайтарган 5 миллион сўми ашёвий далил сифатида олинган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора олиш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Қашқадарёда икки кишини ўқишга киритиб қўйиш учун 10 минг доллар пора олган шахс қўлга тушгани, Фарғонада Тошкент тиббиёт академиясига ўқишга киритиб қўйиш учун 10 минг доллар олган шахс ушлангани тўғрисида хабар берилганди.