Миллий матбуот марказида «Олмалиқ КМК» АЖнинг беш ойлик ишлаб чиқариш ва экспорт кўрсаткичлари бажарилишига бағишланган матбуот анжумани бўлиб ўтди. Унда йирик саноат корхонаси ҳисобланган Олмалиқ кон-металлургия комбинатида 2022 йилнинг 5 ойи якунлари ҳамда ишлаб чиқарилаётган маҳсулотларнинг экспорти бўйича амалга оширилаётган ишлар, комбинатнинг экспорт салоҳияти ҳақида маълумот берилди.
Матбуот анжуманида ОКМК бошқаруви раисининг ходимлар ва ижтимоий масалалар бўйича ўринбосари Саъдий Шерматов, бош муҳандиснинг технологиялар бўйича ўринбосари Абдуқаҳҳор Сайназаров, ОКМК экспорт бўлими бошлиғи Комил Бадалов ва ОАВ вакиллари иштирок этишди.
«Олмалиқ КМК» АЖ мис ишлаб чиқариш бўйича нафақат Марказий Осиё, балки дунёдаги йирик корхоналардан бири ҳисобланади. Комбинат мис ишлаб чиқариш ҳажми бўйича Россия ва Қозоғистондан кейин учинчи ўринда туради: корхона йилига 148 минг тоннага яқин мис ишлаб чиқаради, шундан 85—90 минг тоннаси экспортга чиқарилади, бу ишлаб чиқариш умумий ҳажмининг тахминан 70 фоизини ташкил этади.
Ҳозирги вақтда комбинат 18 турдаги экспортбоп, юқори ликвидли маҳсулотларни сотмоқда. Мис корхонанинг асосий маҳсулоти бўлиб қолмоқда.
«Олмалиқ КМК» АЖ бош муҳандисининг технологиялар бўйича ўринбосари – техник бўлим бошлиғи Абдуқаҳҳор Сайназаровнинг таъкидлашича, ўтган 5 ой давомида комбинат барча белгиланган ишлаб чиқариш вазифаларини бажарган.
«2022 йилнинг ўтган даври мобайнида ‘Олмалиқ КМК’ АЖ томонидан 13 640,4 миллиард сўмлик товар маҳсулотлари ишлаб чиқарилди, режа 121,4 фоизга уддаланган ҳолда, ўтган йилнинг шу даврига нисбатан ўсиш суръати 115,7 фоизни ташкил этди», — дея таъкидлади Абдуқаҳҳор Сайназаров.
Тадбир иштирокчиларига маҳаллийлаштириш дастури бўйича амалга оширилаётган ишлар бўйича ҳам маълумот берилди. Маълум бўлишича, бу йўналишда 117,0 миллиард сўмлик маҳсулот ишлаб чиқарилган, режа кўрсаткичлари эса 128,0 фоизга бажарилган. Ўсиш суръати 160,3 фоизни ташкил этган.
Аҳамиятлиси, комбинат ўтган 5 ойда 3 342,7 миллиард сўмлик соф фойдага эришиб, режа 143,5 фоизга бажарилган.
Маҳсулотлар кесимида оладиган бўлсак, 58 625 тонна мис ишлаб чиқарилган ҳолда вазифа 100 фоизга бажарилган. Олтин ва кумуш металлини ишлаб чиқариш бўйича ҳам белгиланган режалар уддаланган.
Экспорт кўрсаткичлари корхона иқтисодий салоҳиятининг йилдан йилга ўсиб бораётганидан далолат беради. Агар 2017 йилда корхона ташқи бозорга қарийб 643,1 миллион долларлик маҳсулот етказиб берган бўлса, 2020 йилда COVID-19 пандемияси билан боғлиқ инқирозларга қарамай, ОКМК маҳсулотларини экспорт қилиш ҳажми 127,7 фоизга ўсиб, 821,5 миллион долларни ташкил қилди. 2021 йилда экспорт 1124,2 миллион долларгача кўтарилди ва ўсиш суръати 136,8 фоизни ташкил этди. Жорий йилда ҳам экспорт прогноз кўрсаткичларининг ошиғи билан бажарилиши кутилмоқда.
2022 йилнинг январь—май ҳолатига кўра, 452 миллион долларлик маҳсулот экспорти амалга оширилиб, режа 144,1 фоизга бажарилган.
Шунингдек, комбинат ноёб ва қимматбаҳо металларни, жумладан, Сурхондарё вилоятида жойлашган Шеробод цемент заводи маҳсулотларининг катта қисмини ҳам экспорт қилмоқда. Хорижий истеъмолчиларга молибден, рений, рух купороси, кадмий, вольфрам, палладий етказиб берилмоқда.
2021 йил бошида рангли металлар учун жаҳон котировкаларининг ўсиши кон-металлургия корхоналарини, хусусан, ОКМКни ривожлантириш учун қўл келди. Масалан, катодли мис ва мисдан тайёрланган маҳсулотларнинг нархи сезиларли даражада ошди. Бу, шубҳасиз, ОКМКнинг ривожланиш даражаси ва унинг маҳсулотларига бўлган талабнинг ошишига ёрдам берди. 2021 йилда жами 1124,2 миллион долларлик мис, рух, қўрғошин, цемент ва бошқа маҳсулотлар экспорт қилиниб, режа 142,4 фоизга бажарилди. Таъкидлаш жоизки, қўшимча қийматли маҳсулотлар экспорти қарийб икки баробарга ошди – ташқи бозорларга 99,8 миллион долларлик мис қувурлар ва мис катанка етказиб берилди.
Яна бир аҳамиятли жиҳати шундаки, корхонанинг экспорт географияси ғоятда кенг. Комбинат маҳсулотларининг истеъмолчилари орасида Озарбайжон, Арманистон, Афғонистон, Беларусь, Болгария, Ҳиндистон, Қозоғистон, Хитой, Қирғизистон, Нидерландия, Россия, Тожикистон, Туркманистон, Туркия, Украина каби дунёнинг йигирмадан ортиқ мамлакатларини кўришимиз мумкин. Бугунги кунда комбинат томонидан Австралия, Индонезия, Польша, Литва, Қатар ва Грузия бозорлари ҳам ўзлаштирилган.
Шунингдек, комбинат томонидан умумий қиймати 6,2 миллион долларлик мис маҳсулотлари янги бозорларга Испания, Австрия, Канада, Португалия, Финландия, Марокаш ва Сингапур давлатларига экспорт қилинди.
Шунингдек, матбуот анжуманида комбинатда кадрлар сиёсати билан боғлиқ саволларга ҳам батафсил жавоб берилди.
Матбуот анжмунида ОАВ вакиллари ўзларини қизиқтирган саволларга батафсил жавоб олишди.
Маълумот шериклик ҳуқуқи асосида тайёрланди.
Изоҳ (0)