Milliy matbuot markazida “Olmaliq KMK” AJning besh oylik ishlab chiqarish va eksport ko‘rsatkichlari bajarilishiga bag‘ishlangan matbuot anjumani bo‘lib o‘tdi. Unda yirik sanoat korxonasi hisoblangan Olmaliq kon-metallurgiya kombinatida 2022-yilning 5 oyi yakunlari hamda ishlab chiqarilayotgan mahsulotlarning eksporti bo‘yicha amalga oshirilayotgan ishlar, kombinatning eksport salohiyati haqida ma’lumot berildi.
Matbuot anjumanida OKMK boshqaruvi raisining xodimlar va ijtimoiy masalalar bo‘yicha o‘rinbosari Sa’diy Shermatov, bosh muhandisning texnologiyalar bo‘yicha o‘rinbosari Abduqahhor Saynazarov, OKMK eksport bo‘limi boshlig‘i Komil Badalov va OAV vakillari ishtirok etishdi.
“Olmaliq KMK” AJ mis ishlab chiqarish bo‘yicha nafaqat Markaziy Osiyo, balki dunyodagi yirik korxonalardan biri hisoblanadi. Kombinat mis ishlab chiqarish hajmi bo‘yicha Rossiya va Qozog‘istondan keyin uchinchi o‘rinda turadi: korxona yiliga 148 ming tonnaga yaqin mis ishlab chiqaradi, shundan 85—90 ming tonnasi eksportga chiqariladi, bu ishlab chiqarish umumiy hajmining taxminan 70 foizini tashkil etadi.
Hozirgi vaqtda kombinat 18 turdagi eksportbop, yuqori likvidli mahsulotlarni sotmoqda. Mis korxonaning asosiy mahsuloti bo‘lib qolmoqda.
“Olmaliq KMK” AJ bosh muhandisining texnologiyalar bo‘yicha o‘rinbosari – texnik bo‘lim boshlig‘i Abduqahhor Saynazarovning ta’kidlashicha, o‘tgan 5 oy davomida kombinat barcha belgilangan ishlab chiqarish vazifalarini bajargan.
“2022-yilning o‘tgan davri mobaynida ‘Olmaliq KMK’ AJ tomonidan 13 640,4 milliard so‘mlik tovar mahsulotlari ishlab chiqarildi, reja 121,4 foizga uddalangan holda, o‘tgan yilning shu davriga nisbatan o‘sish sur’ati 115,7 foizni tashkil etdi”, — deya ta’kidladi Abduqahhor Saynazarov.
Tadbir ishtirokchilariga mahalliylashtirish dasturi bo‘yicha amalga oshirilayotgan ishlar bo‘yicha ham ma’lumot berildi. Ma’lum bo‘lishicha, bu yo‘nalishda 117,0 milliard so‘mlik mahsulot ishlab chiqarilgan, reja ko‘rsatkichlari esa 128,0 foizga bajarilgan. O‘sish sur’ati 160,3 foizni tashkil etgan.
Ahamiyatlisi, kombinat o‘tgan 5 oyda 3 342,7 milliard so‘mlik sof foydaga erishib, reja 143,5 foizga bajarilgan.
Mahsulotlar kesimida oladigan bo‘lsak, 58 625 tonna mis ishlab chiqarilgan holda vazifa 100 foizga bajarilgan. Oltin va kumush metallini ishlab chiqarish bo‘yicha ham belgilangan rejalar uddalangan.
Eksport ko‘rsatkichlari korxona iqtisodiy salohiyatining yildan yilga o‘sib borayotganidan dalolat beradi. Agar 2017-yilda korxona tashqi bozorga qariyb 643,1 million dollarlik mahsulot yetkazib bergan bo‘lsa, 2020-yilda COVID-19 pandemiyasi bilan bog‘liq inqirozlarga qaramay, OKMK mahsulotlarini eksport qilish hajmi 127,7 foizga o‘sib, 821,5 million dollarni tashkil qildi. 2021-yilda eksport 1124,2 million dollargacha ko‘tarildi va o‘sish sur’ati 136,8 foizni tashkil etdi. Joriy yilda ham eksport prognoz ko‘rsatkichlarining oshig‘i bilan bajarilishi kutilmoqda.
2022-yilning yanvar—may holatiga ko‘ra, 452 million dollarlik mahsulot eksporti amalga oshirilib, reja 144,1 foizga bajarilgan.
Shuningdek, kombinat noyob va qimmatbaho metallarni, jumladan, Surxondaryo viloyatida joylashgan Sherobod sement zavodi mahsulotlarining katta qismini ham eksport qilmoqda. Xorijiy iste’molchilarga molibden, reniy, rux kuporosi, kadmiy, volfram, palladiy yetkazib berilmoqda.
2021-yil boshida rangli metallar uchun jahon kotirovkalarining o‘sishi kon-metallurgiya korxonalarini, xususan, OKMKni rivojlantirish uchun qo‘l keldi. Masalan, katodli mis va misdan tayyorlangan mahsulotlarning narxi sezilarli darajada oshdi. Bu, shubhasiz, OKMKning rivojlanish darajasi va uning mahsulotlariga bo‘lgan talabning oshishiga yordam berdi. 2021-yilda jami 1124,2 million dollarlik mis, rux, qo‘rg‘oshin, sement va boshqa mahsulotlar eksport qilinib, reja 142,4 foizga bajarildi. Ta’kidlash joizki, qo‘shimcha qiymatli mahsulotlar eksporti qariyb ikki barobarga oshdi – tashqi bozorlarga 99,8 million dollarlik mis quvurlar va mis katanka yetkazib berildi.
Yana bir ahamiyatli jihati shundaki, korxonaning eksport geografiyasi g‘oyatda keng. Kombinat mahsulotlarining iste’molchilari orasida Ozarbayjon, Armaniston, Afg‘oniston, Belarus, Bolgariya, Hindiston, Qozog‘iston, Xitoy, Qirg‘iziston, Niderlandiya, Rossiya, Tojikiston, Turkmaniston, Turkiya, Ukraina kabi dunyoning yigirmadan ortiq mamlakatlarini ko‘rishimiz mumkin. Bugungi kunda kombinat tomonidan Avstraliya, Indoneziya, Polsha, Litva, Qatar va Gruziya bozorlari ham o‘zlashtirilgan.
Shuningdek, kombinat tomonidan umumiy qiymati 6,2 million dollarlik mis mahsulotlari yangi bozorlarga Ispaniya, Avstriya, Kanada, Portugaliya, Finlandiya, Marokash va Singapur davlatlariga eksport qilindi.
Shuningdek, matbuot anjumanida kombinatda kadrlar siyosati bilan bog‘liq savollarga ham batafsil javob berildi.
Matbuot anjmunida OAV vakillari o‘zlarini qiziqtirgan savollarga batafsil javob olishdi.
Ma’lumot sheriklik huquqi asosida tayyorlandi.
Izoh (0)