Қорақалпоғистоннинг Тўрткўл туманида валюта олди-сотдиси билан шуғулланиб келган фуқаро ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Тўрткўл туман бўлими томонидан тезкор тадбир ўтказилган. Унда Тўрткўл савдо комплекси олдида валюта қимматликларини ноқонуний муомалага киритиш фаолияти билан шуғулланиб келаётган фуқаро Х.К. бошқа бир фуқаро Й.га 2 900 долларни 32,2 миллион сўмга сотган вақтида ашёвий далиллар билан ушланган.
Ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилган. Ҳозирда тергов ҳаракатлари ўтказилмоқда.
Аввалроқ Тошкент, Андижон ва Қашқадарё вилоятларида ноқонуний валюта айирбошлаш ҳолатларига чек қўйилгани, Хоразм ва Қашқадарёда жами 5,2 минг долларни ноқонуний сотишга уринган валютафурушлар ушлангани, Қашқадарёда валютафуруш 2,5 минг долларни сотаётганида қўлга тушгани тўғрисида хабар берилганди.
Изоҳ (0)