Самарқанд, Андижон вилоятлари ва Тошкент шаҳрида фуқароларни пул эвазига ўқишга киритмоқчи бўлган шахслар ушланди. Бу ҳақда Бош прокуратура ҳузуридаги департамент хабар берди.
Департамент ҳамда ДХХнинг Қўшработ тумани бўлимлари томонидан 9 июнь куни ўтказилган тезкор тадбирда Самарқанд давлат университети ўқитувчиси С.М. фуқаро Н.ни 4 минг доллар эвазига ушбу университет қошидаги «Ўзбекистон-Финляндия» педагогика институтига ўқишга киритиб қўйишга келишиб, шундан 2 000 АҚШ долларни 7 июнь куни қўлга киритиб, қолган 2 000 долларни олган вақтида ашёвий далиллар билан ушланган.
Тадбир давомида С.М. ўз айбига иқрор бўлиб, Н.дан олган 2 минг долларни қайтаргани процессуал тартибда расмийлаштирилган.
Департаментнинг Тошкент шаҳар бошқармаси томонидан ДХХ ходимлари билан ҳамкорликда ўтказилган тезкор тадбирда, фуқаро У.М. ва Ўзбекистон давлат жисмоний тарбия ва спорт университети талабаси Н.Р. фуқаро Д.ни танишлари ёрдамида ушбу университетга ўқишга киритиб қўйиш эвазига 3,5 минг долларни олган вақтида ашёвий далиллар билан ушланган.
Шу каби департаментнинг Андижон вилоят бошқармаси томонидан бошқарма ишонч телефонига келиб тушган мурожаатига асосан ўтказилган тезкор тадбирда, Бўстон тумани Абу Али ибн Сино номидаги жамоат саломатлиги техникуми директори А.А. ўз хизмат мавқейидан фойдаланиб, фуқаро О.ни ўзи раҳбарлик қилиб келаётган техникумга ўқишга киритиб қўйиши эвазига 300 долларни олган вақтида ашёвий далиллар билан ушланган.
Қайд этилишича, мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)