Россия Ташқи ишлар вазирлиги Британия оммавий ахборот воситаларида фаолият олиб бораётган 29 нафар журналист ҳамда мудофаа комплексининг 20 нафар вакилининг мамлакатга киришини тақиқлади.
Жумладан, The Guardian бош муҳаррири Кетрин Винер, BBC телерадиокорпорациясининг раиси Ричард Шарп, The Times нашри бош муҳаррири Жон Уитероу, сиёсатчи Марк Галеотти Россия санкцияларига учраган.
Шунингдек Буюк Британия мудофаа вазири ўринбосари Жереми Куин (аввалроқ мудофаа вазири Бен Уоллес ҳам Россия санкциялари учраганди), ҳарбий денгиз кучлари қўмондони Бенжамин Ки, ҳарбий ҳаво кучлари раҳбари Майкл Уигстонга ҳам тақиқлар қўлланилган.
Россия ТИВ баёнотига кўра, санкциялар рўйхатига тушган британиялик журналистлар Россия ҳамда Украинадаги урушга оид бир томонлама ва ёлғон ахборот тарқатишга алоқадор, мудофаа комплекси раҳбарлари эса Украинага қурол-яроғ етказиб беришда иштирок этмоқда.
Аввалроқ Украина президенти Владимир Зеленскийнинг Путинга, Россия ҳукумати аъзолари ва Россия ОТМлари ректорларига қарши санкциялар жорий қилгани, шунингдек, Россия ТИВ АҚШнинг 61 нафар фуқаросига, хусусан, катта компанияларнинг топ-менежерлари ва амалдорларига санкция қўллагани хабар қилинганди.
Изоҳ (0)