Туркманистон дўконларида «саломатлик ва ташқи кўринишга зарар етказувчи» косметика воситалар мусодара қилинмоқда

Туркманистонда аёллар учун косметика маҳсулотлари сотиладиган дўконлар текширила бошланди, деб хабар бермоқда «Хроника Туркменистана» мухбирлари.

Дўконлардаги жавонлардан истеъмолчиларнинг «соғлиғи ва ташқи кўриниши»га зарар етказиши мумкин бўлган косметик воситаларни олиб ташлаш талаб қилинмоқда.

Сотувчилар ва харидорларнинг сўзларига кўра, инспекторларда аниқ кўрсатмалар йўқ ва улар нимани сотиш мумкин, нима мумкин эмаслигини кўз билан аниқлаяпти.

Одатда улар лак, лаб бўёғи ва киприклар учун тушни жавонлардан олиб ташлашни талаб қилмоқда. Гигиена воситалари — шампунь, гел ва крем сотишга рухсат берилган.

Эслатиб ўтамиз, апрель ойида Туркманистон расмийлари аёлларнинг ташқи ва маънавий қиёфаси учун қайғура бошлаган эди. Мамлакатда талабалар ва ўқувчи қизлар билан учрашувлар ўтказилиб, уларга миллий анъаналарга риоя қилиш зарурлиги, соч бўяш, макияж, киприк ва тирноқ ўстириш, шунингдек, лабларини катталаштириш, умуман олганда, ҳаддан ташқари ёрқин ранглардан фойдаланишга йўл қўйилмаслиги кераклиги айтилган.

Шунингдек, давлат ва бюджет ташкилотларида ишловчи аёллар билан ҳам шундай суҳбатлар ташкил этилган. Бўйсунмаганларга жарима ва ишдан бўшатиш билан таҳдид қилинган.

Шу билан бирга, «Озодлик» радиосига кўра, аёлларга шахсий автомашиналарнинг олд ўриндиқларида ўтириш, такси ҳайдовчиларига эса аёлларга ўз хизматларини таклиф қилиш норасмий равишда тақиқланган.