Ўзбекистонда биринчи марта коронавирусга қарши иммун сути олиш имконияти амалиётда исботлаб берилди. Тадқиқот натижалари хорижнинг Frontiers in Nutrion журналида чоп этилган.
Натижаларга кўра, ZF-UZ-VAC2001 рекомбинант вакцинаси билан эмланган сигир ва эчкиларда иккинчи дозадан 2 ҳафта ўтиб, уларнинг қон зардобларида нейтралловчи антитаналар ҳосил бўлиши кўрсатиб берилди.
Нейтралловчи антитаналар фаоллиги 3-дозадан кейин 21 кун ўтиб (биринчи эмлангандан 77 кун ўтиб) энг юқори фаолликка кўтарилиб, зардоб 120 марта суюлтирилганда ҳам лаборатория тестларида тирик коронавирус кўпайишини тўхтатиши аниқланди.
Иммун сути хусусиятлари 62,5 градус температурада 30 минут давомидаги пастеризация режимида сақланиб қолиши аниқланиб, иммун сутининг терапевтик мақсадларда ишлатиш имконияти очиб берилди.
Қорақалпоғистонда Panaev Farms чорвачилик корхонасида коронавирусга қарши фаол нейтралловчи иммун сути (Immune Milk бренди остида) пастеризацияланган сут ҳолида кичик ҳажмда ишлаб чиқариш режалаштирилган. Ҳозирда технологик линиялар синовдан ўтказилмоқда.
Янги технология асосида оғиз сутидан болалар ва катталар учун биологик фаол, тез шимилувчи капсулаларни ишлаб чиқариш устида тадқиқотлар олиб борилмоқда.
Изоҳ (0)