Голландия компанияси шу йил охирида мижозларга дунёдаги биринчи қуёш автомобилини етказиб беришни бошлайди, бу орқали ёзда бир неча ой зарядсиз машина ҳайдаш мумкин бўлади. Бу ҳақда Bloomberg хабар берди.
Lightyear — 2016 йилда Нидерландияда ташкил этилган компания. Ҳозирда у автомобиль капоти ва томи бўйлаб эгри қуёш панеллари ўрнатилган 949 та моделни ишлаб чиқармоқда.
Қуёшдан олинадиган қувват кунига 70 километр (43 миля) масофани босиб ўтишга имкон беради.
Электромобильлар — бу тўғри йўналишдаги қадам, лекин улар ҳали ҳам асосан қазиб олинадиган энергияга боғлиқ бўлган электр тармоғига қарам, — деди бош ижрочи директор Лекс Хёфслоот 250 минг евро (265 минг доллар) турадиган Lightyear 0 моделининг тақдимотида.
Унга кўра, Lightyear 0 модели қуёш панели орқали ҳар доим зарядга эга бўлишга ва камроқ қувватлантиришга имкон беради.
Компаниянинг таъкидлашича, Valmet Automotive томонидан Финляндияда ишлаб чиқариладиган автомобиль ёзда Амстердамда икки ой, Португалияда эса етти ойгача қувват олмасдан ҳайдаш имконини беради.
Lightyear 60 киловатт-соатлик аккумуляторнинг бир марта қувватланиши билан 700 километрдан ортиқ масофани босиб ўтади.
Lightyear 0 нинг кичик ишлаб чиқариш сериясидан сўнг компания 30 минг евролик бошланғич баҳода янада арзонроқ моделни ишлаб чиқаришни режалаштирмоқда. Жараён 2024 йил охири ёки 2025 йилда бошланиши режалаштирилган.
Аввалроқ «Ўзавтосаноат» ва BYD илк электромобилни қачон ишлаб чиқариши мумкинлиги маълум бўлган эди.
Изоҳ (0)